بيقول ماعندوش vision وهو عنده جوة

لما بيكون عندك  فكرة start up و عايز تعمل community على الface book وهتبدأ بالصلا عالنبي تحط strategy اول حاجة بتفكر فيها هي الvision وال mission وال objective والgoal ودول بقى اهم حاجة واغلس حاجة في نفس الوقت.

مش عشان مش بتعرف تطلعها أو تحدد انت عايز ايه .. بالعكس ابسلوتلي بس عشان كلنا بنتلخبط فيهم ومبنعرفش نحددهم.

يالهوي لما تيجي تقعد انت والتيم بتاعك تحددوا انهي  الvision وانهون الmission بتاعتكم ..بط بلدي بيكاكي اه والله .

واحد يقولك احنا الvision بتاعتنا نجيب جون والتاني يقوله لا ياحبيي دي الmission والتالت العميق بكل روقان لا ده ولا ده ,ده الobjective .وهو ده المفروض يعني انه مادام جون جي من كلمة goal يبقى ايه .. اللي هو لو جبنا حمادة هلال كان زمانه حلها !

وعشان اللخبطة دي ونحل الالتباس اللي عند البعض احسن طريقة انك تربطها بمثال وتقيس عليه بعد كدة .. افرض يعني انك انت شوقي غريب  ومعاك المنتخب وعندك لاقدرالله vision يبقى المفروض ان الvision بتاعتكم انكم تمسكوا كاس العالم .. قبل ما تموتوا او احنا نموت :/

الvision غالبا بتبقى عبارة عن مشهد مستقبلي مابتشفهوش غير في خيالك  بتلقطله صورة وتبقى في ذهنك طول الوقت #تنمية_ببشرية_ستايل . يعني زي  I have a dream زي أنك عايز تبني community للناس اللي بيحبوا

يبقى لازم تعمل أيه  بقى عشان تشوف  الvision دي في أرض الواقع , صح لازم يبقى عندك mission , يعني المفروض لو أنت شوقي غريب يبقى الmission بتاعك انك تحسن مستوى اللعب اللي عندك  عشان توصلوا للنهائيات  ..

الmission بتبقي خطوات اعتبارية او انتقالية يعني دايما بتسال نفسك أيه اللي محتاج أعمله  عشان احقق  الvision بتاعتي ؟ محتاج اننا نعمل كذا.يعني لو أنت عندك vision انك تبني community عن السفر و السياحة ,أيه الmission بتاعتك أنك  تحبب الناس في السفر وتساعدهم في انك تخلي السفر بالنسبة لهم متعة .

واللي هيساعدنا في تحقيق الmission هو عمو الobjective وده ممكن نجزئه على كل خطوة من خطوات الstrategy أو ممكن ناخدها لوكشة واحدة .. انا من رايي نعمل الاتنين  عشان تبقى محدد انت هتعمل ايه بالظبط .

الobjective عامة هدف بيكون ضمني .. يعني أيه الهدف اللي هبني على أساسه الstrategy وهيساعدني أني احقق الmission بتاعتي .. المفروض الobjective بتاعك كشوقي غريب أنك تكون الأول على مستوى المجموعات ..وتكونوا أقوى فرقة في الموسم . زي مثلا الobjective بتاعك ك start up انك تكون الأول في المجال ده .. أو احسن واحد بيعرف يعمل كذا.

 الgoal بقى انك  توصل لعدد X من النقط  وx من الاجوان وده بيعتمدعلى تحليلك للcompetitor اللي قدامك اللي هنتكلم عليه في المرات اللي جاي.. وبناءا على الكلام ده هتعملوا الstrategy بتاعتكم وهتبقى حاجة سهلة لأنكم ظبطوا الأساس اللي فوق  .. دي كانت فكرتي واخر ما توصلت اليه في الvision وال mission والobjective والgoal . وضربت عليه مثالين مش مثال واحد ..كلواحد وصل للسطر ده يتفضل مشكورا يقولي امثلة تانية من واقع الحياة توضح مفهوم الvision والmission وخلافه عنده , حتى تعم الأفادة وهكذا و بالمناسبة حد يشرحلي يعني ايه تسلل ؟  :P

"ثُمَّ أَتْبَعَ سَبَبًا"

من اكتر الايات اللي بقف عندها رغم انها صغيرة جدا الاية دي  "ثُمَّ أَتْبَعَ سَبَبًا"  تكرراها ده معناه ان في رسالة معينة ربنا عايز يوصلهالنا ومش بس كدة ,هو عايزها تترسخ  فينا وتبقى  اسلوب حياة عندنا  ..مسألتش نفسك ليه آيه تتكرر  4 مرات في اخر سورة بتتقري كل اسبوع  يعني في الشهر لسانك بيرددها  12مرة في السنة  144مرة ؟
اكيد فيه سر ورا ده واكيد من واجبنا اننا نعرفه .. انا النهاردة وانا باقرا السورة دي وصلّي احساس معين ..ودي اللي دفعني ان اكتب في الـBlog بتاعتي عن الخاطرة اللي جاتلي دي. 

قصة  ذي القرنين بصفة عامة وطريقة ذكر القران ليها بصفة خاصة ممكن كل واحد فينا يبصلها بمنظور مختلف و يطلع صح .. المنظور اللي انا بصيت بيه النهاردة على الايات دي .. هي ان ازاي الانسان يستغل القدرة والامكانيات اللي ربنا ادهاله في التأثير على الناس .. تحس الثلاث كلمات بتاعة الاية دي "ثُمَّ أَتْبَعَ سَبَبًا" كانت كلمة السر اللي خلدت تاريخ ذي القرنين ..الدافع او المبدأ اللي المفروض تمشي بيه في مراحل حياتك زي ما هو عمل ..ذي القرنين مر باربع مراحل كان مفتاح كل مرحلة فيهم "ثم اتبع سببا "

مرحلة التمكين

دي المرحلة الأولى اللي مر بيها ذي القرنين .. " إِنَّا مَكَّنَّا لَهُ فِي الأرْضِ وَآتَيْنَاهُ مِنْ كُلِّ شَيْءٍ سَبَبًا ,, فَأَتْبَعَ سَبَبًا "

المرة الوحيدة اللي هتلاقي فيها حرف الجر "ف" بدل "ثم" .. وده بيدل على قد ايه لازم تكون سريع وحاسم في استغلال الفرص اللي ادهالك ربنا  لما يمكَنك من حاجة ويديك المفتاح بتاعها ..متوقفش لازم تتبع السبب وتسعى عشان تشوف انت هتعمل بيه ايه .

مرحلة النجاح

في اعتقاد ناس كتير ان المرحلة دي هي المرحلة النهائية ..بس في القصة دي  هتلاقي ان  المرحلة دي بالذات كانت مرحلة انتقالية ..جسر مابين مرحلتين اللي فاتت واللي بعدها  ..النجاح اللي حققه ذي القرنين في انه يأسس دستور في بلد ملخصه الايتين دول  "قَالَ أَمَّا مَنْ ظَلَمَ فَسَوْفَ نُعَذِّبُهُ ثُمَّ يُرَدُّ إِلَى رَبِّهِ فَيُعَذِّبُهُ عَذَابًا نُكْرًا (87) وَأَمَّا مَنْ آمَنَ وَعَمِلَ صَالِحًا فَلَهُ جَزَاءً الْحُسْنَى وَسَنَقُولُ لَهُ مِنْ أَمْرِنَا يُسْرًا (88)"  كان يقدر يحكم البلد دي و يعيش  ملك ويرتاويبعت جيوشه تفتح البلاد اللي هو عاوزها ..

بس هو كان شايف نفسه انه يقدر يدي اكتر وان ده مجرد نجاح هينتهي مع موته .. الرجل ده كان عنده vision   انه النجاح اللي عايز يحققه يخليه خالد للأبد وده اللي هتفسره المراحل اللي جاية .

مرحلة الـDiscomfort able zone

بعد المرحلة اللي فاتت والنجاح اللي هو عمله هيخليك تسأل نفسك  سؤال , ايه اللي يخلي ملك يروح بنفسه  مكان واضح من الايات انه مش مريح وانه مقفر وانه عبارة عن صحرا جردا  عشان يلاقي حل لمشكلة الناس اللي هناك. 

"حَتَّى إِذَا بَلَغَ مَطْلِعَ الشَّمْسِ وَجَدَهَا تَطْلُعُ عَلَى قَوْمٍ لَمْ نَجْعَلْ لَهُمْ مِنْ دُونِهَا سِتْرًا (90) كَذَلِكَ وَقَدْ أَحَطْنَا بِمَا لَدَيْهِ خُبْرًا" 

العلماء اختلفوا في تفسير الاية دي ..من حيث هو راح فين بالظبط  وعمل ايه في المكان ده ؟  .. بس الفكرة عندي هو ايه الدافع اللي خلاه يروح اصلا .. واضح انه كان مؤمن بمبدأ الـDis comfortable zone  , وان انت مش رسالتك في الارض انك تدور على اللي يريحك ..انت رسالتك في الارض انك تدور على الحاجة اللي تعبك فيها بيريحك ..و انك عمرك ما هتعرف تعيش في الdis comfortable zone غير لما تكون بتعمل الحاجة اللي عندك شغف بيها .. وهي دي المرحلة الرابعة  اللي هنتكلم عليها

مرحلة الابداع بالشغف

ربنا_سبحانه وتعالى_ لما ذكر  بلاد مغرب الشمس .. كان واضح المشكلة والحل بس النتيجة مكانتش واضحة  ..محدش عارف  الناس حصلها ايه بعد ماطبقت الدستور ده ... هو كمان مكانش فيه اي اشارة اذا كانت الناس دي طبقت الدستور ده ولا لأ ..والايتين اللي بيتكلموا عن مطلع الشمس .. موضحتش الحل من الاساس .. لكن الايات اللي في المرحلة دي مش بس وضحت المشكلة والحل لأ دي كمان وضحت النتيجة اللي وصلوا ليها . شوف الأيات كدة 

) حَتَّى إِذَا بَلَغَ بَيْنَ السَّدَّيْنِ وَجَدَ مِنْ دُونِهِمَا قَوْمًا لَا يَكَادُونَ يَفْقَهُونَ قَوْلًا (93) قَالُوا يَا ذَا الْقَرْنَيْنِ إِنَّ يَأْجُوجَ وَمَأْجُوجَ مُفْسِدُونَ فِي الْأَرْضِ فَهَلْ نَجْعَلُ لَكَ خَرْجًا عَلَى أَنْ تَجْعَلَ بَيْنَنَا وَبَيْنَهُمْ سَدًّا (94) قَالَ مَا مَكَّنِّي فِيهِ رَبِّي خَيْرٌ فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْمًا (95) آَتُونِي زُبَرَ الْحَدِيدِ حَتَّى إِذَا سَاوَى بَيْنَ الصَّدَفَيْنِ قَالَ انْفُخُوا حَتَّى إِذَا جَعَلَهُ نَارًا قَالَ آَتُونِي أُفْرِغْ عَلَيْهِ قِطْرًا (96) فَمَا اسْطَاعُوا أَنْ يَظْهَرُوهُ وَمَا اسْتَطَاعُوا لَهُ نَقْبًا (97) 

انت  متخيل مدى حجم المشكلة اللي الناس واقعة فيها .. بيتم استنفاذ ثرواتهم قدام عنيهم وهم قليلين الحيلة  ..انت متخيل وصل بيهم العجز لحد  انهم عارفين الحل ومعاهم الموارد بتاعته ومش عارفين يعملوه ..انا عندي انهم مكانوش يعرفوا يعملوا ايه اكرملهم .. طيب شوف بقى العبقرية واستغلال المعرفة اللي وصّلت  ذي القرنين انه ينفذ عملية بنا السد ..كام واحد في اللي كانوا موجودين ساعتها يعرف ان كتل الحديد لما تتعرض لدرجة حرارة معينة "اذا جعله نارا" ويتصب عليها نحاس تعمل سبيكة صلدة ملساء ..نتيجتها ان محدش يقدر يتسلقه ومحدش يعرف يهده ..صباح الفل . ده الابداع.

ماذا لو؟ 

تخيل معايا كدة لو ذي القرنين اكتفى بالمرحلة الاولى وفرح بالمواهب اللي ربنا مديهالوا بس متحركش وقال انا مش عارف انا المفروض اعمل ايه ؟

كان في حد هيفتكروا اصلا ..طيب لو كان فرح بالنجاح اللي حققه بالمرحلة الثانية وقال كدة تمام وانا مش عاوز حاجة من الدنيا ..كان ايه اللي هيحصل ...

اعتقد كان هيفضل اسمه بين الناس لمدة جيلين او تلاتة بعد موته ..  السبب اللي خلى ذي القرنين يذكر في القران ويتردد اسمه لحد دلوقتي هو الانجاز الاخير اللي عمله,,  التاثير اللي سابه في العالم ..

هو حقق الvision بتاعته ..هو وصل فعلا لمرحلة الخلود للأبد ..وانت كمان لو اتبعت المراحل ديي في حياتك هتوصل للخلود ..الفكرة ان كل مرحلة من المراحل دي كان مفتاحها الاية اللي قولنا عليها "ثم اتبع سببا"

كلمة اخيرة 

في الاخر االلي انا عايزة اقوله ان ربنا مادلكش حاجة واحدة بس عشان تعيش حياة واحدة ,  هو اداك حاجات كتير .. انت المطلوب منك انك تكتشفها ..  فاتبع سببا .. مينفعش يبقى فكرتك عن النجاح انه يبقى معاك شقة وعربية ومتجوز ومخلف وتقعد في comfort zone ..ثم اتبع سببا.. لازم من فترة للتانية تجرب حاجة جديدة وتحاول مرة واتنين وتلاتة ممكن تفشل؟ جايز, وممكن تنجح ؟اكيد .. ثم اتبع سببا .. قعد دور وجرب لحد ماتلاقي الحاجة اللي مختلفة اللي تأثر على العالم كله حاجة تعيش عشان تحققها ..وتحققها عشان تعيش ..ثم اتبع سببا .. وبعد ماتلاقيها وتعملها وتوصل وتنجح لازم تحط في دماغك ان انت مكنتش هتقدر تعمل حاجة من دي غير بفضل ربنا عليك  .. وان لولاه ماكنتش حاجة من دي حصلت "  قَالَ هَٰذَا رَحْمَةٌ مِّن رَّبِّي ۖ فَإِذَا جَاءَ وَعْدُ رَبِّي جَعَلَهُ دَكَّاءَ ۖ وَكَانَ وَعْدُ رَبِّي حَقًّا ".

check out part two [bye bye 2013]

كل يوم بنتعلم فيه حاجات عن اليوم الي قبله 

كل يوم صفحة بيضة على يميننا مستنية يتكتب فيها حاجات حلوة

وصفحة سودة على شمالنا مستنية يتمسح منها حاجات وحشة :)

2013 من اكتر السنين المؤثرة في حياتي مش لمدى الانجازات اللي حققتها بل بالعكس لان تقريبا اكتر سنة اكتشفت فيها عيوب نفسي وعيوب اللي حواليا .السنة دي قلعت فيها نظارة الحياة بقى لونها بمبي وشوفت الحياة بالوانها الطبيعية بالحلو والوحش بتاعها بصوا مقدرش اقول انها مروعة لان لسة متعمقتش فيها اوي .بس هي مش حلوة زي مافريد الاطرش قال "الحياة حلوة بس نفهمها" وخاصة لما نفهمها !!

اكتر سنة مريت فيها بمواقف وازمات معنوية كتير اما الازمات المادية فمازلت بمر بيها وشكلها ناوية تحتفل بالكريسماس معايا لا مش الكريسماس ده كريسماس 2015... اصيلة يامادية 

سنة 2013 كانت فيها اهم نقطة تحول في حياتي الا وهي .. اني حصلت على درجة علمية "بكالوريوس قد الدنيا" و داخلة في التانية "ماجستير وكدة" وطبعا انتوا عارفين انها مش حبا في التعليم ولا حاجة ده بس عشان اسلي نفسي مبقاش قاعدة زي الشوال في البيت احس بردك ان بعمل حاجة لحد ماتفرج 

اتعلمت كذا حاجة واكتشف كذا حقيقة خاصة بالحياة والدنيا ..في منها طبقته وفي منها بنصح بيه وبحاول اطبقه ..وفي منها عارفاه صح ومبطبقوش .. النهاردة ان شاء الله هقول ملخص للي طلعت بيه السنة دي ......استرخوا كدة واستعيذوا بالله وسموا :)  . ..ها نبدا ,,مستعدين ...يلا  على بركة الله

1-لقد نفذ رصيدكم 

تعاملاتك مع الناس زي تعاملاتك مع البنوك ..ماتديش لحد حاجة غير لما يقدملك ضمانات لو ماعندوش ضمانات خليك انت الاحسن واقدملوا قرض حسن :) .. ولما حد يعمل معاك حاجة كويسة ردهاله الضعف ..ولو حد عمل معاك حاجة وحشة شوف رصيده عندك يكفي لانك تعديهاله ولا لا .. انما لو لقيت رصيده خلص قله عفوا لقد نفذ رصيدكم 

2-الانسان موقف 

"هناك موقف جيد يمحي سيئات شخص تجاهك ..وهناك موقف سيء ينسيك ماذا فعل هذا الشخص من اجلك " #حقيقة 

بما اننا بشر احساسنا بالم بيفوق احساسنا بالفرح بمراحل فاهنفتكر المواقف الوحشة اكتر,,في مواقف هتسامح فيها, وفي مواقف هتعديها, لكن هتقابلك مواقف مساحتها هتبقى اكبر من مساحة التسامح اللي جواك ..عمرك ما هتقدر تنساها ومهما تمر السنين هتلاقي جرحها بينأح عليك زي اول مرة. 

مش شرط تكون جية من ناس كنت بتحبهم وكانوا يفرقوا معاك .. ممكن يكون عشان جت من ناس مابطيقهومش والحياة اضطرتك انك تتعامل معاهم وانت جيت على نفسك واستحملتهم ظنا بان يوم من الايام تلاقي منهم رجا لكن خذلوك ..يلا مش مهم في داهية اهم حاجة انت كويس .

ماتزعلش من حد لانك لو زعلت منهم ده معناه انك لازم تصالحهم وترجعوا زي الاول وكدة ..خد موقف ..حط حواجز مناسبة وقولهم بالمفتشي  ده اخركم معايا ..

3-ماتاذيش نفسك بالكراهية  

عارف لما يكون في ايدك كشاف اضاءته عاليه وتقف قدام مرايه وتسلط عليها الضوء هينعكس على عنيك و هتتوجع هو بالظبط ده اللي بيحصل لما بتكره حد ..الكراهيه مبتأذيش غير صاحبها اما الشخص المكروه فده زي المرايه مش هيحس بيها اصلا...

نصيحه مني لو ماعرفتش تحب حد ماتكرهوش .. وسيب دايما بابك موارب متعرفش بكره ممكن يحصل ايه ومين معاك.

4-الافورة وحشة مفيش كلام 

اكتر حاجة اكتشفتها في نفسي السنة اللي فاتت اني ساعات بافور افورة التنين ..ودي عادة سيئة جدا ..الافورة وحشة في كل حاجة حتى لو الحاجة دي حلوة ...

الافورة في الحب , الافورة في الزعل ,,الافورة في الفرح ,,الافورة في التضحية ,, الافورة في اي حاجة وفي كل حاجة ..خلي عندك توازن على مستوى حياتك كلها ..متخليش حاجة تيجي على حاجة ..انا من 2014 هبدا جديا اني اخذ بالي من كل حاجة وهاجتهد اني اوصل لحالة التوازن العام .. كل واحد فيكم يشوف نفسه هو بيافور في ايه ويبدا يحد منه ويخليه هدف في السنة الجديدة . 

5-اعمل الخير لانك محتاجه 

احنا بنعمل الخير ليه ؟ 

عشان في ناس كتير محتاجة اننا نساعدها وندخل الفرح لقلبها ونشوف الابتسامة على وشها ..هو ده الظاهر بس الحقيقة مش كدة. 

الحقيقة ان احنا اللي محتاجين مساعدة احنا عايزين ندخل الفرح قلوبنا ومحتاجين نشوف الابتسامة على وشنا ..احساس انك انسان وانك ايديك مبسوطة احساس رائع احنا محتاجين نعمل الخير عشان نحس بادميتنا اللي كل مالها بتضمر من اللي بنشوفه في دنيتنا ..اعمل خير عشان تحس بوجودك ..وغيرك يحس بيك ..اعمل خير علشان انت بجد اكتر واحد  محتاجه

6-فاقد الشيءممكن يعطيه 

معظمنا سلم لمقولة "فاقد الشيء لا يعطيه" هي فعلا من المسلمات  لكن صراحة هناك اشياء مكن اننا نعطيها وهي مش عندنا اصلا لانها مابتتوقفش على امتلاكنا ليها ولا لا ..بقدر ماهي بتتوقف على استعداد اللي قدامك لاخذ هذا الشيء. 

مثال : انت ممكن تدي لحد امل رغم انه مش عندك ..لان هو نفسه يسمع كلمة امل نفسه حد يقولهالوا..

ممكن تدي لحد السعادة وانت لا تمتلكها عشان هو قرر يبقى سعيد بس كان عايز منك شوية دعم ...

ممكن تدي لحد نصيحة انت مبتعملهاش وهو يعملها لانه شافها انها صح و مقنعة .. اقولك على حاجة مش هتصدقها ممكن انت تقتنع بالكلام اللي بتقوله ليه ويبقى عندك زي اللي اديتهوله بالظبط سواء كان امل او سعادة او تنفذ النصيحة اللي انت نصحته بيها..

في النهاية دي كانت اهم الدروس للي طلعت بيها على مدار هذا العام اتمنى انها تفيدكم و في انتظار مشاركتكم ومداخلتكم وارائكم وتعليقاتكم وكل واحد يقولنا هو ايه اهم الدروس اللي طلع بيها السنة دي لتعم الافادة :) 

استعد اليومين اللي جايين دول وضب قايمة لاهدافك في 2014 ..قايمة بالكتب اللي ناوي تقراها ,,قايمة بالحاجات اللي نفسك تشتريها 

سامح واننسى عشان ترتاح وابدا صفحة جديدة وربنا يرزقك السداد والتوفيق :)) 

دمتم سالمين

check out part one [كشف حساب]

سالفل عليكم :))
واضح ان احنا دخلنا في شهر ديسمبر وواضح كمان ان فيه اجماع على كدة .. الكلام ده لاحظته من يوم الاحد اللي فات [1/12/2013]
..مما جعلني اشعر بضرورة عمل كشف حساب سنوي لما ههبته هذا العام و هببه العام معايا ..
بس ياسيدي .. جبت ورقة وقلم وقسمت الورقة لتلات اقسام ..
اول قسم "اهداف" كنت حاطاها في دماغي وحققتها ..
ثاني قسم "انجازات"  مكنتش حاطاها في دماغي بس وقعت في طريقي وحققتها بفضل الله
 تالت قسم "علاقاتي الاجتماعية" وده تقريبا قسم جديد انا اول مرة احطه السنة دي في كشف الحساب بتاعي وده اللي هنتكلم عنه النهاردة .
الموضوع ده شاغل بالي من بدري يمكن عشان كدة حبيت ان اخليه ضمن الحاجات اللي بيتعمل ليها كشف حساب كل سنة بل المفروض كل اسبوع ...
المهم اول حاجة كتبت انا اتعرفت على مين السنة دي ومين كنت عارفاهم قبل كدة لكن علاقتي بيه بقت قوية السنة دي ومين اللي كانوا صحابي ودلوقتي مفيش بيني وبينهم حاجة ومين بعد ومين قرب وكل اللي اتعرفت عليهم هما بالنسبة لي ايه دلوقتي ..
كتبت كل الناس اللي في حياتي تقريبا وعلاقتي بكل واحد واصلة لفين دلوقتي ..على مااذكر كتبت استاتيوس مرة عالفيس ان في كل فترة بنحتاج نعيد ترتيب قوائم اصداقائنا لان فيه منهم بيتصعد لمركز اول في حياتك وفيه منهم بيترحل لمركز اخير وفيه اللي بيخرج من القائمة نهائي وبيوضع على الهامش  .
المهم بقيت اتامل في القايمة اللي عملتها وافتكر كل واحد اتعرفت عليه ازاي او على راي مارك "first met" كل واحد كان ايه وتوصلت اربع  تصنيفات صنفت بيها اصحابي من حيث كيفية التعارف اللي بيني وبينهم _التصنيف ده عام يعني ممكن تطبقه على صحابك بردك :D_...
اول تصنيف :
هو شخص بذل مجهود عشان يدخل حياتك ..ايا كان المجهود ده ايه بس هتلاقي نفسك حسيت انه هو تعب عشان يوصلك ..وفي فرق بين واحد بذل مجهود وواحد اقتحم حياتك او فرض نفسه عليك الاولانية ارقى بطبعها لانه بيديك فيها مساحة من الحرية انه يدخل حياتك ولا لا .او مقدار دخوله في حياتك قد ايه ..الصنف ده هو احسن صنف انا باعتبره  .. لان بيبقى عايز يعمل كل حاجة كصديق عشان يسعدك بيقف جنبك بيسال عليك بيساعدك واحيانا من ضمن حيله لتأكيد الصداقة اللي بينكم انه بيديك جزء من اسراره او بيشاركك مشاكله كضمان منه انه انتوا فعلا بقيته اصدقاء.....
لكن نصيحتي ليك حسسه فعلا ان انتوا اصدقاء بس متحطش عليه امال ضخمة لان هو هدفه انه يدخل حياتك بس بمجرد ماهيدخل هيطلع تاني .. مش عيب فيك ولا فيه!!!....
هو شايفك بطل والا ماكنش بذل مجهود عشان يقربك بمجرد ماهيقرب ويكتشف انك انسان عادي فخلاص كدة شكرا ... يعني انا عايزاك تبقى متوقع منه انه في يوم من الايام مش هيبقى معاك الا لو كنت فعلا اثبتله ان انت بطل!! فمتزعلش اوي لما ينفضلك لانك  من الاول مكنتش حاطوا ضمن حساباتك..
 تاني تصنيف :
هو شخص انت بذلت مجهود عشان تدخل حياته ... وده بيبقى نتيجته حاجة من التلاتة يااما استجاب ليك وبقيتوا اصحاب فعلا,يااما نفضلك وفهمك انه مش انت اللي المفروض يصاحبك . ياما التالت انه استغلك وباع واشترى في اللي خلفوك  ..
طبعا افكس للاتنين الاخرانيين وخليك مع الاول استجابلك قشطة انتوا اصحاب وحبايب ويارب يديم الود كدة على طول...
ولو ان مفيش حاجة مضمونة وزي ماكان الصنف الاولاني شايفك بطل فانت كمان شايف اخينا ده بطل وبتقربله على هذا الاساس ..اللي انا عايزة اوضحولك لما تشوفوا وتعرف انه مش بطل ولا حاجة وانه انسان زيه زينا وانه ليه ميزات وعيوب وبيغلط عادي ياريت متتصدمش قوي او ياريت متخليهوش مرجع ليك وتبقى مجرد تابع وفاهم انه كل اللي بيعملوا ده الصح تأكد ان ي مانت شايف انه له مهارات وانه بيعمل حاجات واو انت برده ليك مهارات وامكانيات هو او غيره هيشوفوها واو....
تالت تصنيف :
الشخص اللي عرض عليك تبقوا اصحاب .._وبقيتوا اصحاب ؟؟لا هو عرض بس!!_ ..
ده نوع من الصداقة انا لا احبذه نهائي لان الصداقة اعمق من انها تبقى مجرد عرض ...ده نوع من انواع المجاملة ..او هبل المجاملة افتكر تطور النوع ده في مراحل حياتي لما كنت باروح النادي وانزل البسين  (حمام السباحة ) وابقى لوحدي او معايا صاحبتي ونبقى عايزين نتعرف على حد جديد عشان نلعب سوا بنشن على حد يبقى قاعد في ساس البسين (حمام السباحة ) لوحده ولا حبذا لو معاه لعبة عشان نلعب وننبسط ونقول جملتنا الشهيرة انا وهي "تصاحبيني "
تقولنا ماشي "هصاحبكم" انتي اسمك ايه انا فلانة وانا فلتكانة طب يلا نلعب... هييييييه... كنا عيال سئيلة.
وتطور النوع ده مع الزمن وداخلين في سنة 2014 ولسة في ناس بتقولك على الفيس "هاي ممكن نتعرف ".."انا حاسس ان احنا هنبقى اصحاب" بامارة ايه انا معرفش ,,فيه مصطلح اسمه "اصدقاء مراسلة" وده بيبقى عبارة عن ناس بينهم اهتمامات مشتركة وبيحاولوا يفيدوا بعض بيها .. ممكن تبقى حلول مشاكل نقاشات اي حاجة من دي الناس دي ممكن متكونش شافت بعض قبل كدة  بس بيستفادوا من بعض ,,المهم الحوار وده حاجة تانية خالص على اللي انا بتكلم عليه دلوقتي عشان ميخطلتش على الناس الامر..
ومن ضمن نماذج عروض الصداقة هو ان حد الزمن دار عليك وعليه وخلاكم تقعدوا مع بعض قعدة في مكان عام لوحدكوا او وسط شلة ايا كان فين ولقيتوا روحكم مؤيدين بعض في اراء كتيرة وبسم الله ماشاء الله كربونة من بعض فولة واتقسمت نصين ياخواتي فلقيتوا بيقولك بكل حماس اتمنى انا وانت نكون اصدقاء ..او ممكن نبقى اصحاب وخدتوا نمر تليفونات وعشتوا اللحظة ونويتوا والنية لله انكم تطبقوا كل مراسم الصداقة .عادة بيكون الشخص ده ياما صاحب صاحبك او صاحبة صاحبتك ..وغالبا بتكون جوة معاميعك نفسك تتعرف عليه ..لدرجة انك بتفرح جدا بالعرض وبتصدقه كمان ...
نصيحتي ليك ماتفرحش بالعرض ده وياحبذا لو موافقتش عليه من البداية عشان ده حوار فاكس..ممكن تبذل مجهود عشان تدخل حياته ويبقى تبع التصنيف التاني وتشوف النتيجة ايه وتمشي على اساسها ده لو انت هتموت علي صحوبيته   ..لكن بحذرك متصدقش العرض ..
رابع تصنيف :
شخص الظروف والقدر اجبركم ان انتوا تبقوا اصدقاء
ده بقى الشخص اللي اول ماقابلته عمرك ماتوقعت انكم تبقوا اصحاب في يوم من الايام وشيئا فشيئا تطورت علاقتكم لحد مابقيتوا فعلا انتيم بمعنى الكلمة ...
عادة هتكون اغلب الظروف اللي بتتحطوا فيها مع الاشخاص دي بتكون ماساوية بعض الشيء ويمكن ده اللي بيدي عمق للعلاقة بتاعتكم وده اللي بيخليها صعب انها تنفك ايا كان اختلافكم .. مهما بعدتوا وافترقتوا عن بعض بتفضلوا دايما على العهد طالما مالم ياتي مايعكر صفو صداقتكم..
.....يتبع

حدوتة قطر

من حوالي سنة ايام ماكانت القطارات شغاله _الله يرحمها ايام _ كنت مسافرة انا وامي في رحلة علاجية الى القاهرة ...ركبت  بعدنا واحدة  في منتصف الثلاثينات والشهادة لله هي ميبنش عليها كانت مدية على 29 سنة مثلا  ..من نظرتي ليها توقعت انها لم يسبق لها الزواج من قبل ..

المهم كعادة المصريين عموما والمسافرين في القطر خصوصا  مبدا التعامل مابينا وبين بعض بيبقى عبارة عن " we are family "  بما اننا هنقعد مع بعد عشرتاشر ساعة على حسب غزالة السواق والقطر ...وعلى ماتفتكرو يعني قبل مايوقفوا القطارات كان القطر بيقعد تلات ايام في الطريق ..وهذا مما ادى الى وجوب رفع الحرج والتكليف يعني بالصلاة عالنبي كدة من اول ماتركب القطر _ربنا ينولنا شوفته تاني _ تسلم على قاعدين ,واللي واقفين, واللي نايمين قدام الحمام... و تتناقشوا في الامور السياسية والحياتية وكدة ..
بيني وبينكم انا مكنتش بحب اتناقش انا كنت بحب اسمع اكتر واتعرف على طريقة التفكير والثقافات ووجهات النظر المبهرة من كل واحد ...بيبقى الامر اكثر اثارة وامتاع من اني اتكلم ...

ومن ضمن المناقشات اللي جذبتي مناقشة البنت دي او الست دي لما الظروف اضطرتني اني اقعد انا وهي جنب بعض ..وبدا النقاش الجاد لما القطر دخل بينا محطة "البلينة" وكنت بسالها احنا وصلنا فين لان هي اللي  قاعدة جنب الشباك ...ردت وقالتلي احنا في البلينة وعقبت بعدها "بلد الحبايب "!! وهنا بدات القصة .
القصة ومافيها ياسادة ان البنت دي او الست دي لما كانت في الكلية زميلها حبها وهي حبته وراح يتقدملها زي الناس المحترمة ولما راح لاهلها اترفض !! والسبب الوحيد لرفضه هو انه مش من نفس القبيلة بتاعتهم ..واسردت بقية القصة بسخط على البلد والقبيلة وقالتلي انها مش هي الوحيدة اللي حصل معاها كدة ...في بنات قرايبها كتير عندهم نفس المشكلة وانه بيترتب عليه مشاكل كتيرة "الظلم بيجر ظلم" زي ماانتوا عارفين يعني البنت اللي من القبيلة دي بيحصل معاها الاتي :
1- مبتتجوزش حد من برة القبيلة او من برة العيلة بتاعتهم .
2-بتتاخر في سن الجواز لان معظم رجالة القبيلة اتجوزت او سافرت برة البلد. 
3-يوم مابيجلها حد من قبيلتها مش مهم متوافق معاها فكريا ثقافيا علميا قرفيا اهم حاجة هو من نفس القبيلة والسلام. 
نكمل حكاية البنت دي او الست دي ..قالتلي  ان هي استسلمت لاهلها وهو مشي ومتعرفش عنه حاجة لحد دلوقتي ومتجوزتش لحد فترة قريبة جدا ... اضطرت تتجوز واحد قريبهم متجوز وعايش في السعودية مع مراته الاجنبية لانه عادي الراجل يتجوز واحد برة القبيله عشان النسب بتاع عياله كدة كدة بيرجعلوا ...
هو مبيحبهاش ولا هي بتحبه!! تقولي اتجوزوا ليه؟  اقولك عشان ام حضرته عايزة تربط ابنها بحاجة في البلد عشان تتضمن انه يجي يزورها فتعمل ايه تقوم تربطه بمصير بنت غلبانة زيها ..والبنت الغلبانة خايفة القطر يفوتها لانها شايفة انها كبرت فوافقت على العرض ده ....
تكملة للقصة .. اتجوزوا وقعد معاها حوالي اربع شهور وبعد كده سافر ...سافر ولم  يعد ... اه ياربي قبل مايتجوزوا وقبل مايسافر هو خلاها تسيب شغلها تقولي ليه اقولك معرفش ..ده انت وتحليلك للموقف .. المهم هي البنت دي او الست دي لم تحقق اهداف الام المرجوة بانه هو يجي يطل عليها وعلى امه بالمرة .وكمان عشان هي زهقت من العيشة دي لانها باختصار مش عايشة فقررت انها تطلب الطلاق وهم قرروا يقرفوها في عيشتها ويخلوها تتنازل اكتر ماهي اتنازلت عن حقوقها من نفقة ومؤخر بلابلابلا ...وبقى  وبينهم وبين بعض المحاكم وبس ياخونا القطر وصل بينا للمحطة اللي عايزينها ..اه حاجة نسيت اقولها لكم هي رجعت للشغل بتاعها تاني بس بدات من الصفر لانها كانت مقدمة استقالة مش دي القضية.... القضية انها مفهمة زمايلها ان هي وجوزها في قمة السعادة ومش قايلة لحد انها هتطلق ولابسة الدبلة لحد دلوقتي وده طبعا عشان احنا مجتمع "......" بنبص للمطلقة على انها "........" بدون النظر في اي ابعاد او اي ظروف ...
انا مش عارفة اقول عليها بنت ولا ست هي كانت ملامحها طفولية جدا وعلى رغم انها كانت لمضة وجريئة الا انها كانت بتكلمني بمنتهى الاستسلام بمنتهى البلادة زي اللي اتبنجت من الظلم اللي شفته ..
عارفة القضية هنا مش قضية بنت او ولد احيانا القصة دي بتحصل ...بس مع الولد لان اهله مبيرضوش يجوزوه واحدة برة عيلتهم الموقرة ...ولا قضية بلد بعينها  هي قالتلي اسم قبيلتها وقالتلي اسم بلدها وقالتلي اسمها بس انا محبتش اذكر اي حاجة من الحاجات دي عشان انا مش عايزة اخصص ولا اشير لفئة معينة ..الموضوع ده بقى فكر منتشر في المجتمع بتاعنا مهما اختلفت البيئة او المعايير..حتى لو في فئة معندهاش الفكر ده وانها عادي بيتجوزوا من برة بس هي متقبلة فكرة التعصب والقبلية ومش بعيد تكون بطبقه بشكل تاني في موضوع تاني غير الجواز ..
انا عايزة اوجه رسالة لكل واحد مقتنع بفكرة التعصب والعنصرية وموافق على شروطها وقوانينها اللي كلها ظلم في ظلم وفاهم انه صاحب قضية .كل اللي اقدر اقولهولك ...اعتزازك بقبيلتك او ببلدك وفخرك بنسبك ميديش لحضرتك اي حق بانك تتحكم في مصير بني ادم عشان دي حياته هو,,هو الوحيد اللي له حق اختيار تفاصيل حياته.. وكمان ليه الحق انه يعبر عن انتماؤه لبلده بالطريقة اللي تعجبه مش اللي تعجبك انت ...

وحاجة كمان معتقدش بالظلم اللي انتوا سببته ليه او ليها هيبقى عنده حب لبلدك او لقبيلتك بعد كدة هيعيش ناقم عليكم وعليها وعلى كل حاجة .

ثم لو انت خايف على ان نسلك يموت او ينقرض  وان الناس ماتسمعش عنه بعد كدة ففي الف طريقة للحفاظ عليه غير انك تظلم بني ادم وتتحكم في مصيره بسبب فكر متخلف جاهلي ..ابسط طريقة خلي فكرك متحضر وقدم حاجة تفيد البشرية ..

عارفة انه في شباب وبنات كتير ممكن يقروا الكلام ده وبيحصل في بلادهم كده ومعندهمش اي مشكلة من الموضوع ده, بل من اهم شروطهم ان الانسان اللي هيرتبطوا بيه يكون من نفس الاصل بتاعهم ..مقدرين ده ولك الحرية فيما تشاء بس مش معنى ان الموضوع جيه في مصلحتك يبقى متعترفش ان ده ظلم وان مينفعش انه يتاخد كعرف او كقانون ...

احنا دلوقتي مش هنقدر نعمل حاجة بخصوص المجتمعات دي وطريقة تفكيرها بس كل اللي احنا نقدر نعمله في الوقت الحالي ان احنا نغير طريقة تفكيرنا احنا ونظرتنا للامور ونستنكره ونقول بتاثر شديد " تؤتؤتؤتؤتؤ ماينفعش كدة " واذا كلف الامر اعمل مقالة زي دي  وهذا اضعف الايمان...

"من المستحيل انك  تغير فكر واحد قد جدك  ومن الصعب انك تغير فكر واحد قدك  لكن من السهل انك تشكل فكر واحد قد ابنك"

املي اننا نربي الاجيال الجديدة  على فكر ارقى من العنصرية ولو بحتة بسيطة .... واختم كلامي بالاية دي اللي بتلخص كل اللي انا كتبته:  
"يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِنْدَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ" صدق الله العظيم

كلنا بشر

امبارح مش امبارح اوي يعني يوم الاحد اللي فات اكتشفت ان انا لحد النهاردة  ماسمعتش فيلم النظارة السوداء بتاعة نادية لطفي واحمد مظهر واحمد رمزي (عزيز) ..وبالصدفة البحتة عرفت ان الفيلم ده  وراية للكاتب الكبير احسان عبد القدوس مما حمسني اكتر اني اتابعه ... عشان مطولش عليكوا الفيلم باختصار بتدور احداثه حوالين بنت مستهترة وعايشة حياتها بالطول والعرض مقضياها بمعنى اصح بعد خروجها من علاقة فاشلة مع واد تافه ورغم تفاهته كانت هي شايفاه ان كل حاجة في حياتها وده راجع على انهم في البيت محدش عرف يربيها لان باختصار شديدة هي مش عايشة في بيت هي عايشة في قمارة ولعياذو بالله وامها صاحبة سيجارة وكاس ..مالاخر هي بيحيط حواليها مجتمع قذر... وبتفضل بانحلالها وسهراتها وشربها لحد مبتقابل الفارس الهمام "الباشمهندس عمر" اللي لفت نظره انها بتلبس النظارة السودة على طول وقرر انه يحولها من "مادي" ل"مديحة" من وحش على هيئة امراة _ده هو اللي قال في الفيلم _ لانسانة محترمة بتخدم المجتمع وبتحس بالطبقات الكادحة وكدة  ,وبعد معافرة وعناء شديدين هتتغير فعلا وتبقى انسانة (جواك وجوايا :) ) .في نفس الوقت اللي هو_الباشمهندس عمر_ هيتحول فيه لانسان مادي حقير وسكر وعربدة والذي منه لحد ما هتكتشف ده وتروح تنصحه وزي مانتوا عارفين الحب يصنع المعجزات _هييح شهيق وزفير_وهيعمل بالنصيحة ويرجع تاني انسان كويس.
اللي مفهمش حاجة من الهري اللي انا هريته فوق يروح يسمع الفيلم على اليوتيوب او يستناه على قناة روتانا زمان انا مش هقطع نفسي يعني .

الرسالة اللي عاوز يوصلها  الكاتب في الفيلم ان مفيش حد معصوم وان اي حد معرض للغلط ولاغراءات الحياة  وان المفروض ان لما نشوف انسان بنحبه ومشي في طريق غلط من باب الوفاء له اننا ننصحه ونحيده على الطريق الغلط اللي ماشي فيه ... وياريت النصح يكون من باب الحب والخوف مش من باب المزايدة .

لكن بالاضافة لكدة كانت فيه رسالة تانية ممكن متكنش واضحة للبعض .. وهي ان مينفعش انك تخلي المرجع ليك مجرد "بشر" وانه مش معنى انه علمك حاجة صح  وانه وضحلك حاجة كانت غايبة عنك  يبقى ده مبرر ان انا اقدس كلامه ومواقفه  وان ابصم بالعشرة على اي حاجة بيقولها وابقى مجرد تابع ليه بل توصل معايا لدرجة من التعصب ومستحملش حد يقول عليه بم .. وده اللي كان واضح ومازال واضح في مواقفنا السياسية بل والاجتماعية ..ان تاييدك لاشخاص وليس مواقف ... في مقولة جميلة بتقول "لا يعرف الحق بالرجال انما يعرف الرجال بالحق " .
لو كانت "مديحة" اللي في الفيلم خلت المرجع ليها "الباشمهندس عمر" وراحت قلدته لما حاله اتعوج بدل ماتنصحه وتردعه عن الظلم .. مكنش عرف يجيب حق الغلابة اللي في المصنع وكان تفشى الفساد في المجتمع .. لكن هي اقتنعت بمبادئ هو رسخها فيها وحبتها وحست بانسانيتها وبقيمة حياتها لما نفذتها والتزمت بيها وده كان سبب النهاية السعيدة اللي في الفيلم .
المغزى :
 متنبهرش باي شخصية تشوفها في حياتك رغم كل الميزات اللي هتكتشفها فمع الوقت هتكتشف عيوب مروعة .
متجسدش مبادئك وقيمك على شكل اشخاص الشخص متغير انما المبادئ ثابتة .خلي تاييدك لمواقف مش لاشخاص.
حب الناس رغم عيوبها ورغم تحفظاتك ورجعهم عن الغلط بدافع الحب مش بدافع المزايدة وان انت احسن منهم .
تغيير انسان ممكن يكون السبب في تغيير العالم .. عمر غير مادي اللي غيرت عمر اللي دافع عن طبقة بحالهما بتشكل تقريبا تلتين المجتمع وبتساعد في بناء التلت الاخر.
اغرس الخير اللي جواك في ناس تانية عشان لما يخلص من عندك,, تلاقي اللي يرجعهولك تاني .

الهدف من المقال ده مش اني احلل فيلم ولا اني اشتغل ناقدة سينمائية انما هي افكار جت في بالي وحبيت اشاركها معاكم :)

اسميتها ريفيو "review"

احيانا وانت بتتفرج على فيلم او بتقرا كتاب او ماشي في الشارع في اي مشهد من مشاهد الحياة بتستوقفك عبارات, جمل, مناظر, وتدعوك للتامل ببتمنى في اللحظة دي انك تعبر عن اللي جواك باي شيء بانك تكتبه, ترسمه, تلحنه, او ممكن تحكيه لواحد صاحبك وتقوله انت استفدت بايه في الموضوع ده ..انا كواحدة من الناس اللي بتستوقفها بعض المواقف قررت اني اختار الاختيار الاول والاختيار الاخير.اخترت ان اعبر بيه بالكتابة ,وفي نفس الوقت احكيهلكم عشان انتوا صحابي :D

ففكرت اني اعمل سلسلة مقالات اسميها  (review) وده بيتكلم عن حاجات ممكن اشوفها واقابلها في حياتي ايا كانت واتكلم عنها تقريبا واقول رايي فيها واقول اللي انا استفدته منها او ايه الدرس اللي طلعت بيه وطبعا هنفتح النقاش فاذا كان حد ليه مداخلة او اضافة او تعديل او نقد
والهدف من السلسة دي حاجتين :
اولا : التامل في الحياة والمواقف اللي بتواجهنا وتدوينها
ثانيا :نطلع  بفكرة او بحكمة  ممكن تفيدنا في حياتنا بعد كده
وده هنوصله من  خلال النقاش ورؤية كل واحد للموضوع او الراي اللي هطرحه في المقالة عشان كده يعني المشاركة بتاعتكم مش بس هتسعدني دي كمان هتفيدني و تفيدك وتفيد كل اللي حوالينا :)

المقالة الاولى للسلسلة في  ميعادنا المعتاد يوم الجمعة الساعة 7 بالليل .. اتمنى من الله ان تنال اعجابكم :) ابقو معنا :D