check out part two [bye bye 2013]

كل يوم بنتعلم فيه حاجات عن اليوم الي قبله 

كل يوم صفحة بيضة على يميننا مستنية يتكتب فيها حاجات حلوة

وصفحة سودة على شمالنا مستنية يتمسح منها حاجات وحشة :)

2013 من اكتر السنين المؤثرة في حياتي مش لمدى الانجازات اللي حققتها بل بالعكس لان تقريبا اكتر سنة اكتشفت فيها عيوب نفسي وعيوب اللي حواليا .السنة دي قلعت فيها نظارة الحياة بقى لونها بمبي وشوفت الحياة بالوانها الطبيعية بالحلو والوحش بتاعها بصوا مقدرش اقول انها مروعة لان لسة متعمقتش فيها اوي .بس هي مش حلوة زي مافريد الاطرش قال "الحياة حلوة بس نفهمها" وخاصة لما نفهمها !!

اكتر سنة مريت فيها بمواقف وازمات معنوية كتير اما الازمات المادية فمازلت بمر بيها وشكلها ناوية تحتفل بالكريسماس معايا لا مش الكريسماس ده كريسماس 2015... اصيلة يامادية 

سنة 2013 كانت فيها اهم نقطة تحول في حياتي الا وهي .. اني حصلت على درجة علمية "بكالوريوس قد الدنيا" و داخلة في التانية "ماجستير وكدة" وطبعا انتوا عارفين انها مش حبا في التعليم ولا حاجة ده بس عشان اسلي نفسي مبقاش قاعدة زي الشوال في البيت احس بردك ان بعمل حاجة لحد ماتفرج 

اتعلمت كذا حاجة واكتشف كذا حقيقة خاصة بالحياة والدنيا ..في منها طبقته وفي منها بنصح بيه وبحاول اطبقه ..وفي منها عارفاه صح ومبطبقوش .. النهاردة ان شاء الله هقول ملخص للي طلعت بيه السنة دي ......استرخوا كدة واستعيذوا بالله وسموا :)  . ..ها نبدا ,,مستعدين ...يلا  على بركة الله

1-لقد نفذ رصيدكم 

تعاملاتك مع الناس زي تعاملاتك مع البنوك ..ماتديش لحد حاجة غير لما يقدملك ضمانات لو ماعندوش ضمانات خليك انت الاحسن واقدملوا قرض حسن :) .. ولما حد يعمل معاك حاجة كويسة ردهاله الضعف ..ولو حد عمل معاك حاجة وحشة شوف رصيده عندك يكفي لانك تعديهاله ولا لا .. انما لو لقيت رصيده خلص قله عفوا لقد نفذ رصيدكم 

2-الانسان موقف 

"هناك موقف جيد يمحي سيئات شخص تجاهك ..وهناك موقف سيء ينسيك ماذا فعل هذا الشخص من اجلك " #حقيقة 

بما اننا بشر احساسنا بالم بيفوق احساسنا بالفرح بمراحل فاهنفتكر المواقف الوحشة اكتر,,في مواقف هتسامح فيها, وفي مواقف هتعديها, لكن هتقابلك مواقف مساحتها هتبقى اكبر من مساحة التسامح اللي جواك ..عمرك ما هتقدر تنساها ومهما تمر السنين هتلاقي جرحها بينأح عليك زي اول مرة. 

مش شرط تكون جية من ناس كنت بتحبهم وكانوا يفرقوا معاك .. ممكن يكون عشان جت من ناس مابطيقهومش والحياة اضطرتك انك تتعامل معاهم وانت جيت على نفسك واستحملتهم ظنا بان يوم من الايام تلاقي منهم رجا لكن خذلوك ..يلا مش مهم في داهية اهم حاجة انت كويس .

ماتزعلش من حد لانك لو زعلت منهم ده معناه انك لازم تصالحهم وترجعوا زي الاول وكدة ..خد موقف ..حط حواجز مناسبة وقولهم بالمفتشي  ده اخركم معايا ..

3-ماتاذيش نفسك بالكراهية  

عارف لما يكون في ايدك كشاف اضاءته عاليه وتقف قدام مرايه وتسلط عليها الضوء هينعكس على عنيك و هتتوجع هو بالظبط ده اللي بيحصل لما بتكره حد ..الكراهيه مبتأذيش غير صاحبها اما الشخص المكروه فده زي المرايه مش هيحس بيها اصلا...

نصيحه مني لو ماعرفتش تحب حد ماتكرهوش .. وسيب دايما بابك موارب متعرفش بكره ممكن يحصل ايه ومين معاك.

4-الافورة وحشة مفيش كلام 

اكتر حاجة اكتشفتها في نفسي السنة اللي فاتت اني ساعات بافور افورة التنين ..ودي عادة سيئة جدا ..الافورة وحشة في كل حاجة حتى لو الحاجة دي حلوة ...

الافورة في الحب , الافورة في الزعل ,,الافورة في الفرح ,,الافورة في التضحية ,, الافورة في اي حاجة وفي كل حاجة ..خلي عندك توازن على مستوى حياتك كلها ..متخليش حاجة تيجي على حاجة ..انا من 2014 هبدا جديا اني اخذ بالي من كل حاجة وهاجتهد اني اوصل لحالة التوازن العام .. كل واحد فيكم يشوف نفسه هو بيافور في ايه ويبدا يحد منه ويخليه هدف في السنة الجديدة . 

5-اعمل الخير لانك محتاجه 

احنا بنعمل الخير ليه ؟ 

عشان في ناس كتير محتاجة اننا نساعدها وندخل الفرح لقلبها ونشوف الابتسامة على وشها ..هو ده الظاهر بس الحقيقة مش كدة. 

الحقيقة ان احنا اللي محتاجين مساعدة احنا عايزين ندخل الفرح قلوبنا ومحتاجين نشوف الابتسامة على وشنا ..احساس انك انسان وانك ايديك مبسوطة احساس رائع احنا محتاجين نعمل الخير عشان نحس بادميتنا اللي كل مالها بتضمر من اللي بنشوفه في دنيتنا ..اعمل خير عشان تحس بوجودك ..وغيرك يحس بيك ..اعمل خير علشان انت بجد اكتر واحد  محتاجه

6-فاقد الشيءممكن يعطيه 

معظمنا سلم لمقولة "فاقد الشيء لا يعطيه" هي فعلا من المسلمات  لكن صراحة هناك اشياء مكن اننا نعطيها وهي مش عندنا اصلا لانها مابتتوقفش على امتلاكنا ليها ولا لا ..بقدر ماهي بتتوقف على استعداد اللي قدامك لاخذ هذا الشيء. 

مثال : انت ممكن تدي لحد امل رغم انه مش عندك ..لان هو نفسه يسمع كلمة امل نفسه حد يقولهالوا..

ممكن تدي لحد السعادة وانت لا تمتلكها عشان هو قرر يبقى سعيد بس كان عايز منك شوية دعم ...

ممكن تدي لحد نصيحة انت مبتعملهاش وهو يعملها لانه شافها انها صح و مقنعة .. اقولك على حاجة مش هتصدقها ممكن انت تقتنع بالكلام اللي بتقوله ليه ويبقى عندك زي اللي اديتهوله بالظبط سواء كان امل او سعادة او تنفذ النصيحة اللي انت نصحته بيها..

في النهاية دي كانت اهم الدروس للي طلعت بيها على مدار هذا العام اتمنى انها تفيدكم و في انتظار مشاركتكم ومداخلتكم وارائكم وتعليقاتكم وكل واحد يقولنا هو ايه اهم الدروس اللي طلع بيها السنة دي لتعم الافادة :) 

استعد اليومين اللي جايين دول وضب قايمة لاهدافك في 2014 ..قايمة بالكتب اللي ناوي تقراها ,,قايمة بالحاجات اللي نفسك تشتريها 

سامح واننسى عشان ترتاح وابدا صفحة جديدة وربنا يرزقك السداد والتوفيق :)) 

دمتم سالمين

check out part one [كشف حساب]

سالفل عليكم :))
واضح ان احنا دخلنا في شهر ديسمبر وواضح كمان ان فيه اجماع على كدة .. الكلام ده لاحظته من يوم الاحد اللي فات [1/12/2013]
..مما جعلني اشعر بضرورة عمل كشف حساب سنوي لما ههبته هذا العام و هببه العام معايا ..
بس ياسيدي .. جبت ورقة وقلم وقسمت الورقة لتلات اقسام ..
اول قسم "اهداف" كنت حاطاها في دماغي وحققتها ..
ثاني قسم "انجازات"  مكنتش حاطاها في دماغي بس وقعت في طريقي وحققتها بفضل الله
 تالت قسم "علاقاتي الاجتماعية" وده تقريبا قسم جديد انا اول مرة احطه السنة دي في كشف الحساب بتاعي وده اللي هنتكلم عنه النهاردة .
الموضوع ده شاغل بالي من بدري يمكن عشان كدة حبيت ان اخليه ضمن الحاجات اللي بيتعمل ليها كشف حساب كل سنة بل المفروض كل اسبوع ...
المهم اول حاجة كتبت انا اتعرفت على مين السنة دي ومين كنت عارفاهم قبل كدة لكن علاقتي بيه بقت قوية السنة دي ومين اللي كانوا صحابي ودلوقتي مفيش بيني وبينهم حاجة ومين بعد ومين قرب وكل اللي اتعرفت عليهم هما بالنسبة لي ايه دلوقتي ..
كتبت كل الناس اللي في حياتي تقريبا وعلاقتي بكل واحد واصلة لفين دلوقتي ..على مااذكر كتبت استاتيوس مرة عالفيس ان في كل فترة بنحتاج نعيد ترتيب قوائم اصداقائنا لان فيه منهم بيتصعد لمركز اول في حياتك وفيه منهم بيترحل لمركز اخير وفيه اللي بيخرج من القائمة نهائي وبيوضع على الهامش  .
المهم بقيت اتامل في القايمة اللي عملتها وافتكر كل واحد اتعرفت عليه ازاي او على راي مارك "first met" كل واحد كان ايه وتوصلت اربع  تصنيفات صنفت بيها اصحابي من حيث كيفية التعارف اللي بيني وبينهم _التصنيف ده عام يعني ممكن تطبقه على صحابك بردك :D_...
اول تصنيف :
هو شخص بذل مجهود عشان يدخل حياتك ..ايا كان المجهود ده ايه بس هتلاقي نفسك حسيت انه هو تعب عشان يوصلك ..وفي فرق بين واحد بذل مجهود وواحد اقتحم حياتك او فرض نفسه عليك الاولانية ارقى بطبعها لانه بيديك فيها مساحة من الحرية انه يدخل حياتك ولا لا .او مقدار دخوله في حياتك قد ايه ..الصنف ده هو احسن صنف انا باعتبره  .. لان بيبقى عايز يعمل كل حاجة كصديق عشان يسعدك بيقف جنبك بيسال عليك بيساعدك واحيانا من ضمن حيله لتأكيد الصداقة اللي بينكم انه بيديك جزء من اسراره او بيشاركك مشاكله كضمان منه انه انتوا فعلا بقيته اصدقاء.....
لكن نصيحتي ليك حسسه فعلا ان انتوا اصدقاء بس متحطش عليه امال ضخمة لان هو هدفه انه يدخل حياتك بس بمجرد ماهيدخل هيطلع تاني .. مش عيب فيك ولا فيه!!!....
هو شايفك بطل والا ماكنش بذل مجهود عشان يقربك بمجرد ماهيقرب ويكتشف انك انسان عادي فخلاص كدة شكرا ... يعني انا عايزاك تبقى متوقع منه انه في يوم من الايام مش هيبقى معاك الا لو كنت فعلا اثبتله ان انت بطل!! فمتزعلش اوي لما ينفضلك لانك  من الاول مكنتش حاطوا ضمن حساباتك..
 تاني تصنيف :
هو شخص انت بذلت مجهود عشان تدخل حياته ... وده بيبقى نتيجته حاجة من التلاتة يااما استجاب ليك وبقيتوا اصحاب فعلا,يااما نفضلك وفهمك انه مش انت اللي المفروض يصاحبك . ياما التالت انه استغلك وباع واشترى في اللي خلفوك  ..
طبعا افكس للاتنين الاخرانيين وخليك مع الاول استجابلك قشطة انتوا اصحاب وحبايب ويارب يديم الود كدة على طول...
ولو ان مفيش حاجة مضمونة وزي ماكان الصنف الاولاني شايفك بطل فانت كمان شايف اخينا ده بطل وبتقربله على هذا الاساس ..اللي انا عايزة اوضحولك لما تشوفوا وتعرف انه مش بطل ولا حاجة وانه انسان زيه زينا وانه ليه ميزات وعيوب وبيغلط عادي ياريت متتصدمش قوي او ياريت متخليهوش مرجع ليك وتبقى مجرد تابع وفاهم انه كل اللي بيعملوا ده الصح تأكد ان ي مانت شايف انه له مهارات وانه بيعمل حاجات واو انت برده ليك مهارات وامكانيات هو او غيره هيشوفوها واو....
تالت تصنيف :
الشخص اللي عرض عليك تبقوا اصحاب .._وبقيتوا اصحاب ؟؟لا هو عرض بس!!_ ..
ده نوع من الصداقة انا لا احبذه نهائي لان الصداقة اعمق من انها تبقى مجرد عرض ...ده نوع من انواع المجاملة ..او هبل المجاملة افتكر تطور النوع ده في مراحل حياتي لما كنت باروح النادي وانزل البسين  (حمام السباحة ) وابقى لوحدي او معايا صاحبتي ونبقى عايزين نتعرف على حد جديد عشان نلعب سوا بنشن على حد يبقى قاعد في ساس البسين (حمام السباحة ) لوحده ولا حبذا لو معاه لعبة عشان نلعب وننبسط ونقول جملتنا الشهيرة انا وهي "تصاحبيني "
تقولنا ماشي "هصاحبكم" انتي اسمك ايه انا فلانة وانا فلتكانة طب يلا نلعب... هييييييه... كنا عيال سئيلة.
وتطور النوع ده مع الزمن وداخلين في سنة 2014 ولسة في ناس بتقولك على الفيس "هاي ممكن نتعرف ".."انا حاسس ان احنا هنبقى اصحاب" بامارة ايه انا معرفش ,,فيه مصطلح اسمه "اصدقاء مراسلة" وده بيبقى عبارة عن ناس بينهم اهتمامات مشتركة وبيحاولوا يفيدوا بعض بيها .. ممكن تبقى حلول مشاكل نقاشات اي حاجة من دي الناس دي ممكن متكونش شافت بعض قبل كدة  بس بيستفادوا من بعض ,,المهم الحوار وده حاجة تانية خالص على اللي انا بتكلم عليه دلوقتي عشان ميخطلتش على الناس الامر..
ومن ضمن نماذج عروض الصداقة هو ان حد الزمن دار عليك وعليه وخلاكم تقعدوا مع بعض قعدة في مكان عام لوحدكوا او وسط شلة ايا كان فين ولقيتوا روحكم مؤيدين بعض في اراء كتيرة وبسم الله ماشاء الله كربونة من بعض فولة واتقسمت نصين ياخواتي فلقيتوا بيقولك بكل حماس اتمنى انا وانت نكون اصدقاء ..او ممكن نبقى اصحاب وخدتوا نمر تليفونات وعشتوا اللحظة ونويتوا والنية لله انكم تطبقوا كل مراسم الصداقة .عادة بيكون الشخص ده ياما صاحب صاحبك او صاحبة صاحبتك ..وغالبا بتكون جوة معاميعك نفسك تتعرف عليه ..لدرجة انك بتفرح جدا بالعرض وبتصدقه كمان ...
نصيحتي ليك ماتفرحش بالعرض ده وياحبذا لو موافقتش عليه من البداية عشان ده حوار فاكس..ممكن تبذل مجهود عشان تدخل حياته ويبقى تبع التصنيف التاني وتشوف النتيجة ايه وتمشي على اساسها ده لو انت هتموت علي صحوبيته   ..لكن بحذرك متصدقش العرض ..
رابع تصنيف :
شخص الظروف والقدر اجبركم ان انتوا تبقوا اصدقاء
ده بقى الشخص اللي اول ماقابلته عمرك ماتوقعت انكم تبقوا اصحاب في يوم من الايام وشيئا فشيئا تطورت علاقتكم لحد مابقيتوا فعلا انتيم بمعنى الكلمة ...
عادة هتكون اغلب الظروف اللي بتتحطوا فيها مع الاشخاص دي بتكون ماساوية بعض الشيء ويمكن ده اللي بيدي عمق للعلاقة بتاعتكم وده اللي بيخليها صعب انها تنفك ايا كان اختلافكم .. مهما بعدتوا وافترقتوا عن بعض بتفضلوا دايما على العهد طالما مالم ياتي مايعكر صفو صداقتكم..
.....يتبع

حدوتة قطر

من حوالي سنة ايام ماكانت القطارات شغاله _الله يرحمها ايام _ كنت مسافرة انا وامي في رحلة علاجية الى القاهرة ...ركبت  بعدنا واحدة  في منتصف الثلاثينات والشهادة لله هي ميبنش عليها كانت مدية على 29 سنة مثلا  ..من نظرتي ليها توقعت انها لم يسبق لها الزواج من قبل ..

المهم كعادة المصريين عموما والمسافرين في القطر خصوصا  مبدا التعامل مابينا وبين بعض بيبقى عبارة عن " we are family "  بما اننا هنقعد مع بعد عشرتاشر ساعة على حسب غزالة السواق والقطر ...وعلى ماتفتكرو يعني قبل مايوقفوا القطارات كان القطر بيقعد تلات ايام في الطريق ..وهذا مما ادى الى وجوب رفع الحرج والتكليف يعني بالصلاة عالنبي كدة من اول ماتركب القطر _ربنا ينولنا شوفته تاني _ تسلم على قاعدين ,واللي واقفين, واللي نايمين قدام الحمام... و تتناقشوا في الامور السياسية والحياتية وكدة ..
بيني وبينكم انا مكنتش بحب اتناقش انا كنت بحب اسمع اكتر واتعرف على طريقة التفكير والثقافات ووجهات النظر المبهرة من كل واحد ...بيبقى الامر اكثر اثارة وامتاع من اني اتكلم ...

ومن ضمن المناقشات اللي جذبتي مناقشة البنت دي او الست دي لما الظروف اضطرتني اني اقعد انا وهي جنب بعض ..وبدا النقاش الجاد لما القطر دخل بينا محطة "البلينة" وكنت بسالها احنا وصلنا فين لان هي اللي  قاعدة جنب الشباك ...ردت وقالتلي احنا في البلينة وعقبت بعدها "بلد الحبايب "!! وهنا بدات القصة .
القصة ومافيها ياسادة ان البنت دي او الست دي لما كانت في الكلية زميلها حبها وهي حبته وراح يتقدملها زي الناس المحترمة ولما راح لاهلها اترفض !! والسبب الوحيد لرفضه هو انه مش من نفس القبيلة بتاعتهم ..واسردت بقية القصة بسخط على البلد والقبيلة وقالتلي انها مش هي الوحيدة اللي حصل معاها كدة ...في بنات قرايبها كتير عندهم نفس المشكلة وانه بيترتب عليه مشاكل كتيرة "الظلم بيجر ظلم" زي ماانتوا عارفين يعني البنت اللي من القبيلة دي بيحصل معاها الاتي :
1- مبتتجوزش حد من برة القبيلة او من برة العيلة بتاعتهم .
2-بتتاخر في سن الجواز لان معظم رجالة القبيلة اتجوزت او سافرت برة البلد. 
3-يوم مابيجلها حد من قبيلتها مش مهم متوافق معاها فكريا ثقافيا علميا قرفيا اهم حاجة هو من نفس القبيلة والسلام. 
نكمل حكاية البنت دي او الست دي ..قالتلي  ان هي استسلمت لاهلها وهو مشي ومتعرفش عنه حاجة لحد دلوقتي ومتجوزتش لحد فترة قريبة جدا ... اضطرت تتجوز واحد قريبهم متجوز وعايش في السعودية مع مراته الاجنبية لانه عادي الراجل يتجوز واحد برة القبيله عشان النسب بتاع عياله كدة كدة بيرجعلوا ...
هو مبيحبهاش ولا هي بتحبه!! تقولي اتجوزوا ليه؟  اقولك عشان ام حضرته عايزة تربط ابنها بحاجة في البلد عشان تتضمن انه يجي يزورها فتعمل ايه تقوم تربطه بمصير بنت غلبانة زيها ..والبنت الغلبانة خايفة القطر يفوتها لانها شايفة انها كبرت فوافقت على العرض ده ....
تكملة للقصة .. اتجوزوا وقعد معاها حوالي اربع شهور وبعد كده سافر ...سافر ولم  يعد ... اه ياربي قبل مايتجوزوا وقبل مايسافر هو خلاها تسيب شغلها تقولي ليه اقولك معرفش ..ده انت وتحليلك للموقف .. المهم هي البنت دي او الست دي لم تحقق اهداف الام المرجوة بانه هو يجي يطل عليها وعلى امه بالمرة .وكمان عشان هي زهقت من العيشة دي لانها باختصار مش عايشة فقررت انها تطلب الطلاق وهم قرروا يقرفوها في عيشتها ويخلوها تتنازل اكتر ماهي اتنازلت عن حقوقها من نفقة ومؤخر بلابلابلا ...وبقى  وبينهم وبين بعض المحاكم وبس ياخونا القطر وصل بينا للمحطة اللي عايزينها ..اه حاجة نسيت اقولها لكم هي رجعت للشغل بتاعها تاني بس بدات من الصفر لانها كانت مقدمة استقالة مش دي القضية.... القضية انها مفهمة زمايلها ان هي وجوزها في قمة السعادة ومش قايلة لحد انها هتطلق ولابسة الدبلة لحد دلوقتي وده طبعا عشان احنا مجتمع "......" بنبص للمطلقة على انها "........" بدون النظر في اي ابعاد او اي ظروف ...
انا مش عارفة اقول عليها بنت ولا ست هي كانت ملامحها طفولية جدا وعلى رغم انها كانت لمضة وجريئة الا انها كانت بتكلمني بمنتهى الاستسلام بمنتهى البلادة زي اللي اتبنجت من الظلم اللي شفته ..
عارفة القضية هنا مش قضية بنت او ولد احيانا القصة دي بتحصل ...بس مع الولد لان اهله مبيرضوش يجوزوه واحدة برة عيلتهم الموقرة ...ولا قضية بلد بعينها  هي قالتلي اسم قبيلتها وقالتلي اسم بلدها وقالتلي اسمها بس انا محبتش اذكر اي حاجة من الحاجات دي عشان انا مش عايزة اخصص ولا اشير لفئة معينة ..الموضوع ده بقى فكر منتشر في المجتمع بتاعنا مهما اختلفت البيئة او المعايير..حتى لو في فئة معندهاش الفكر ده وانها عادي بيتجوزوا من برة بس هي متقبلة فكرة التعصب والقبلية ومش بعيد تكون بطبقه بشكل تاني في موضوع تاني غير الجواز ..
انا عايزة اوجه رسالة لكل واحد مقتنع بفكرة التعصب والعنصرية وموافق على شروطها وقوانينها اللي كلها ظلم في ظلم وفاهم انه صاحب قضية .كل اللي اقدر اقولهولك ...اعتزازك بقبيلتك او ببلدك وفخرك بنسبك ميديش لحضرتك اي حق بانك تتحكم في مصير بني ادم عشان دي حياته هو,,هو الوحيد اللي له حق اختيار تفاصيل حياته.. وكمان ليه الحق انه يعبر عن انتماؤه لبلده بالطريقة اللي تعجبه مش اللي تعجبك انت ...

وحاجة كمان معتقدش بالظلم اللي انتوا سببته ليه او ليها هيبقى عنده حب لبلدك او لقبيلتك بعد كدة هيعيش ناقم عليكم وعليها وعلى كل حاجة .

ثم لو انت خايف على ان نسلك يموت او ينقرض  وان الناس ماتسمعش عنه بعد كدة ففي الف طريقة للحفاظ عليه غير انك تظلم بني ادم وتتحكم في مصيره بسبب فكر متخلف جاهلي ..ابسط طريقة خلي فكرك متحضر وقدم حاجة تفيد البشرية ..

عارفة انه في شباب وبنات كتير ممكن يقروا الكلام ده وبيحصل في بلادهم كده ومعندهمش اي مشكلة من الموضوع ده, بل من اهم شروطهم ان الانسان اللي هيرتبطوا بيه يكون من نفس الاصل بتاعهم ..مقدرين ده ولك الحرية فيما تشاء بس مش معنى ان الموضوع جيه في مصلحتك يبقى متعترفش ان ده ظلم وان مينفعش انه يتاخد كعرف او كقانون ...

احنا دلوقتي مش هنقدر نعمل حاجة بخصوص المجتمعات دي وطريقة تفكيرها بس كل اللي احنا نقدر نعمله في الوقت الحالي ان احنا نغير طريقة تفكيرنا احنا ونظرتنا للامور ونستنكره ونقول بتاثر شديد " تؤتؤتؤتؤتؤ ماينفعش كدة " واذا كلف الامر اعمل مقالة زي دي  وهذا اضعف الايمان...

"من المستحيل انك  تغير فكر واحد قد جدك  ومن الصعب انك تغير فكر واحد قدك  لكن من السهل انك تشكل فكر واحد قد ابنك"

املي اننا نربي الاجيال الجديدة  على فكر ارقى من العنصرية ولو بحتة بسيطة .... واختم كلامي بالاية دي اللي بتلخص كل اللي انا كتبته:  
"يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِنْدَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ" صدق الله العظيم

كلنا بشر

امبارح مش امبارح اوي يعني يوم الاحد اللي فات اكتشفت ان انا لحد النهاردة  ماسمعتش فيلم النظارة السوداء بتاعة نادية لطفي واحمد مظهر واحمد رمزي (عزيز) ..وبالصدفة البحتة عرفت ان الفيلم ده  وراية للكاتب الكبير احسان عبد القدوس مما حمسني اكتر اني اتابعه ... عشان مطولش عليكوا الفيلم باختصار بتدور احداثه حوالين بنت مستهترة وعايشة حياتها بالطول والعرض مقضياها بمعنى اصح بعد خروجها من علاقة فاشلة مع واد تافه ورغم تفاهته كانت هي شايفاه ان كل حاجة في حياتها وده راجع على انهم في البيت محدش عرف يربيها لان باختصار شديدة هي مش عايشة في بيت هي عايشة في قمارة ولعياذو بالله وامها صاحبة سيجارة وكاس ..مالاخر هي بيحيط حواليها مجتمع قذر... وبتفضل بانحلالها وسهراتها وشربها لحد مبتقابل الفارس الهمام "الباشمهندس عمر" اللي لفت نظره انها بتلبس النظارة السودة على طول وقرر انه يحولها من "مادي" ل"مديحة" من وحش على هيئة امراة _ده هو اللي قال في الفيلم _ لانسانة محترمة بتخدم المجتمع وبتحس بالطبقات الكادحة وكدة  ,وبعد معافرة وعناء شديدين هتتغير فعلا وتبقى انسانة (جواك وجوايا :) ) .في نفس الوقت اللي هو_الباشمهندس عمر_ هيتحول فيه لانسان مادي حقير وسكر وعربدة والذي منه لحد ما هتكتشف ده وتروح تنصحه وزي مانتوا عارفين الحب يصنع المعجزات _هييح شهيق وزفير_وهيعمل بالنصيحة ويرجع تاني انسان كويس.
اللي مفهمش حاجة من الهري اللي انا هريته فوق يروح يسمع الفيلم على اليوتيوب او يستناه على قناة روتانا زمان انا مش هقطع نفسي يعني .

الرسالة اللي عاوز يوصلها  الكاتب في الفيلم ان مفيش حد معصوم وان اي حد معرض للغلط ولاغراءات الحياة  وان المفروض ان لما نشوف انسان بنحبه ومشي في طريق غلط من باب الوفاء له اننا ننصحه ونحيده على الطريق الغلط اللي ماشي فيه ... وياريت النصح يكون من باب الحب والخوف مش من باب المزايدة .

لكن بالاضافة لكدة كانت فيه رسالة تانية ممكن متكنش واضحة للبعض .. وهي ان مينفعش انك تخلي المرجع ليك مجرد "بشر" وانه مش معنى انه علمك حاجة صح  وانه وضحلك حاجة كانت غايبة عنك  يبقى ده مبرر ان انا اقدس كلامه ومواقفه  وان ابصم بالعشرة على اي حاجة بيقولها وابقى مجرد تابع ليه بل توصل معايا لدرجة من التعصب ومستحملش حد يقول عليه بم .. وده اللي كان واضح ومازال واضح في مواقفنا السياسية بل والاجتماعية ..ان تاييدك لاشخاص وليس مواقف ... في مقولة جميلة بتقول "لا يعرف الحق بالرجال انما يعرف الرجال بالحق " .
لو كانت "مديحة" اللي في الفيلم خلت المرجع ليها "الباشمهندس عمر" وراحت قلدته لما حاله اتعوج بدل ماتنصحه وتردعه عن الظلم .. مكنش عرف يجيب حق الغلابة اللي في المصنع وكان تفشى الفساد في المجتمع .. لكن هي اقتنعت بمبادئ هو رسخها فيها وحبتها وحست بانسانيتها وبقيمة حياتها لما نفذتها والتزمت بيها وده كان سبب النهاية السعيدة اللي في الفيلم .
المغزى :
 متنبهرش باي شخصية تشوفها في حياتك رغم كل الميزات اللي هتكتشفها فمع الوقت هتكتشف عيوب مروعة .
متجسدش مبادئك وقيمك على شكل اشخاص الشخص متغير انما المبادئ ثابتة .خلي تاييدك لمواقف مش لاشخاص.
حب الناس رغم عيوبها ورغم تحفظاتك ورجعهم عن الغلط بدافع الحب مش بدافع المزايدة وان انت احسن منهم .
تغيير انسان ممكن يكون السبب في تغيير العالم .. عمر غير مادي اللي غيرت عمر اللي دافع عن طبقة بحالهما بتشكل تقريبا تلتين المجتمع وبتساعد في بناء التلت الاخر.
اغرس الخير اللي جواك في ناس تانية عشان لما يخلص من عندك,, تلاقي اللي يرجعهولك تاني .

الهدف من المقال ده مش اني احلل فيلم ولا اني اشتغل ناقدة سينمائية انما هي افكار جت في بالي وحبيت اشاركها معاكم :)

اسميتها ريفيو "review"

احيانا وانت بتتفرج على فيلم او بتقرا كتاب او ماشي في الشارع في اي مشهد من مشاهد الحياة بتستوقفك عبارات, جمل, مناظر, وتدعوك للتامل ببتمنى في اللحظة دي انك تعبر عن اللي جواك باي شيء بانك تكتبه, ترسمه, تلحنه, او ممكن تحكيه لواحد صاحبك وتقوله انت استفدت بايه في الموضوع ده ..انا كواحدة من الناس اللي بتستوقفها بعض المواقف قررت اني اختار الاختيار الاول والاختيار الاخير.اخترت ان اعبر بيه بالكتابة ,وفي نفس الوقت احكيهلكم عشان انتوا صحابي :D

ففكرت اني اعمل سلسلة مقالات اسميها  (review) وده بيتكلم عن حاجات ممكن اشوفها واقابلها في حياتي ايا كانت واتكلم عنها تقريبا واقول رايي فيها واقول اللي انا استفدته منها او ايه الدرس اللي طلعت بيه وطبعا هنفتح النقاش فاذا كان حد ليه مداخلة او اضافة او تعديل او نقد
والهدف من السلسة دي حاجتين :
اولا : التامل في الحياة والمواقف اللي بتواجهنا وتدوينها
ثانيا :نطلع  بفكرة او بحكمة  ممكن تفيدنا في حياتنا بعد كده
وده هنوصله من  خلال النقاش ورؤية كل واحد للموضوع او الراي اللي هطرحه في المقالة عشان كده يعني المشاركة بتاعتكم مش بس هتسعدني دي كمان هتفيدني و تفيدك وتفيد كل اللي حوالينا :)

المقالة الاولى للسلسلة في  ميعادنا المعتاد يوم الجمعة الساعة 7 بالليل .. اتمنى من الله ان تنال اعجابكم :) ابقو معنا :D

it's complicated "الامر معقد :( "

بعد كتابة مقالة "الحب من طرف تالت" وبعد النقاشات اللي جاتلي بخصوصها حبيت اوضح شوية حاجات قبل ما اتكلم في موضوع جديد .... 

اولا : الموضوع مش مسالة عنصرية او اني منحازة للبنات الفكرة ان النموذج اللي قدمته المرة اللي فاتت تناولته من وجهة نظر نسائيه وذلك لاني احتكاكي للبنات اكثر وخاصة في مشاكلهم والمواقف اللي بيواجهوها وطبعا بصفتي بنت فسهل جدا اني اجسد احساسهم جوايا واعيشه واعبر عنه بسهولة .. واكيد فيما بعد لما اكتسب خبرة حياتيه اكثر هتكلم عن مشاكل ممكن تؤرق الولاد بس ماوعدكوش انها تبقى بنفس القوة ومع ذلك ساحاول جاهدة .

ثانيا : انا مقالاتي مبتقولش حلال وحرام وده واضح جدا ,هي بتقتصر  على عرض نماذج بشوفها في حياتي وبحللها بمنطقية وب احكم عليها بناءا على وجهة نظري ,مبادئي , البيئة اللي نشات فيها ,والتجارب اللي مريت بيها ..فممكن انت تكون متحفظ فتشوف اللي بكتبه ده انحلال !!  وممكن تكون متحرر فتشوف اللي بكتبه ده تزمت !!...وممكن تكون زيي (نفس فكري يعني) فتشوف اللي بكتبه ده مش بطال او عادي  ... لكن انا لا اتكلمت على فقه ولا اتكلمت على  شرع ولا اي حاجه من دي مع اني كان يشرفني اني اتناول مواضيع فقهية وشرعية تكون اكثر افادة من اللي انا بقوله لكني  باختصار شديد معنديش علم كافي اني اتكلم في المواضيع دي "ومن قال لا اعلم فقد افتى " .

معلش طولت عليكم في النهاية انا اتقبل الراي والراي الاخر بس هما نقطتين حبيت اوضحهم للناس ..

نتوكل على الله بقى وندخل في موضوع جديد ... وزي مالمرة اللي فاتت حاطينا على الولاد _انا بهزر :D_ هنحط النهارده على الولاد برده بس مش لوحدهم هنحط على البنات معاهم ..اكيد عرفتوا انا بتكلم عن مين ..مادام قولت ولاد وبنات يبقى اكيد بتكلم عن ال"COUPLES " والكلمة دي واسعة جدا وتحتها نماذج كتير احنا هناخد نموذج صغنتت قد كده هو ,وهنتكلم عنه وده كفيل انه يجبلي الشتيمة ليا وللي يتشددلي نظرا لانتشاره بين الاجواء الشبابية ..... وان الناس ممكن مايعجبهاش الكلام بس انا هقوله واجري على الله ..

هنبدا كلامنا بقصة  شاب في اولى كلية تحرر من الزي الرمادي او الكحلي الكئيب والسواد اللي شافة ايام الثانوي  وابهرته الالوان الصاخبة في الحرم الجامعي وخاصة بعد انتشار الاصفر والفسفوري والبطيخي الفاقع اللي كرهني في البطيخ كله ..ولقى انه مجتمع جديد وانه كبر وشنبه خضر وانها فرصة مناسبة انه يلاقي بنت الحلال اللي هتحل معاه الشيتات وتبلغه بمواعيد السكاشن وتصورله ورق الكورسات ويقعدوا في كافيه قال ايه بيذاكرو مع بعض عشان عليهم امتحان بكرة لمادة هيشلوها ان شاء الله ...

ومن الصعيد الاخر هنتكلم عن البنوتة الكيوت ايوة للي كانت لابسه فسفوري من شوية اللي برده ابهرتها جلجلة الشعور , ونضارات ديور dior , وتسقيط البنطلون .... الخ الخ الخ . 

بدون الدخول في تفاصيل هما اكتشفو انهم بيحبوا بعض وانهم مايقدروش يعيشوا من غير بعض !! فقرروا انهم ياخدوا نمر تليفونات بعض, ويكلموا بعض, ويشيتوا مع بعض, ولا ضير في انهم يخرجوا ويتفسحوا برده مع بعض .

في حاجة احب اوضحها الشخصين اللي بنتكلم عنهم دول اللي هما الكابلز هما مش بيسلوا وقتهم ولا حاجه هما فعلا واخدين الموضوع بجد وهو اكدلها ان بعد 7 سنين بالظبط هيروح يتقدملها رسمي ايوة يادوب 7 سنين ,عد معايا .. 4او 5 سنين على مايخلص كلية .سنة اوسنتين جيش سنة او سنتين  زيهم على مايكون نفسه ويجهز حاله .. بالظبط في حدود 10 سنين !!. 

طيب سؤال ياترى السبع اوالعشر سنين هتمر عليهم ازاي ؟

تكاثرت الاقاويل بهذا الموضوع بس مما لاشك فيه انهم هيجيبوا هدايا لبعض في اعياد ميلادهم ,, هم الفئة الوحيدة اللي بتحيي اعياد الحب وبتنفّع محلات الدباديب والمجات ,, وعارفين البوستات الرومانسية اللي على الفيس بتوع صفحات رومانس وكوني له انثى يكن لكي رجل والحاجات اللي بتفقع المرارة دي ..هما بيعملوا حاجات زي كده ,.,., وده الوجه الناعم للحدوته

نيجي بقى للحتة الخشنة ,, وهي ان الولد اللي مجلجل شعرة مبقاش ولد بقى راجل (عليها), وبيتحكم وبتامر وروحي ومتروحيش  والبسي ومتلبسيش وصاحبي دي ومتصاحبيش ... المشكلة مش في كده المشكلة ان الهانم موافقة ومبسوطة كمان والموضوع ده هيحسوه البنات صحابها السناجل وعارفين انها مرتبطة لما يقولولها يلا نخرج نروح الحتة الفلانية ترد تقول بنبرة ناعمة مستفزة "لا معلش اصل مقلتش ل "فلان"  ... "اصل لو رحت من وراه هيزعق وهيزعل" .. "اصل هو قالي مروحش المكان ده" .. ولو لاحظنا هنا هنلاقيهم بيعيشو دور مش دورهم ... وسبقوا الاوان ...وده في حد ذاته كارثة..

ناهيك بقى عن الخناقات اللي بتحصل لو مسالش عليها بعد امتحان الميد تيرم ... ولا متصلش امبارح او اتصل بس مكلمهاش غير نص ساعة بس !!

وهي وكمان .. وقتعها مطينة لو شافها بتكلم زمايلها الولاد ...مين دول وايه اللي موقفك معاهم ؟ ولازم يقف معاها على اساس انه محرم مثلا !!... وحاجات كتير من هذا القبيل .

بعد ماخلصوا دراسة ..لو كان نفسهم طويل ولسة مفركشوش ..فهو بيتجه يشوف جيشه وهي بتشوفلها شغلانه ..حجة الدراسة اللي بطفش بيها العرسان خلصت بقت عليها ضغوط اكتر بطلعها على عنيه .. هو مش عارف يلاقيها منين ولا منين فيدبوا خناقة يتخاصموا-تعيط -متاكلش-تعيا.- يرجع يصالحها, وتستمر هذه اللوب الى ان يخلص الولد جيشه.. دي لو كانت لسة عاملة بأصلها ومستنياه.

خلص جيش ..دور على شغل ...وهنفترض احسن الاحتمالات انه لقى شغل ... اشتغل والعشر سنين خلصوا والمفروض مالوش حجة ...

هو فعلا مالوش حجة بس في نفس الوقت مالوش نفس !! زهق ..حقه صراحة .. هنفترض احسن الاحتمالات برده ونقول  انه هيحاول يعمل راجل للنهاية وهو بيدعي من كل قلبه ان تيجي منها ويتفركش الموضوع .. هو مش عايز يطلع ندل وفي نفس الوقت مش عايز يلبس ...والموضوع عنده بقى شبه روتيني وعندها هي كمان ..الاتنين عندهم ملل عاطفي من بعض بس هيعملوا ايه بيكابروا عايزين يجيبوا اخره....

ايا كانت النهاية سواء كملو ولا مكملوش ... هما بداو غلط ومحدش يقدر ينكر ده بما فيهم هما .. انا ضد الاختيار العمياني و بشجع جدا ان الواحد والواحدة يختاروا شريك حياتهم .. ومؤمنة بمبدا الحب اللي قبل الجواز بس مش  اقصد النوع ده من الحب

المعنى اللي اقصده ان احنا نراقب بعض في صمت لحد فعلا مانتاكد اننا مناسبين لبعض .. ويوم مانعترف لبعض بده تبقى في خطوة رسمية هتتاخد كبرهان لهذا الحب ....

لكن اللي حصل ده اسمه استهبال واذا كنت انا بشوف نماذج زي دي قريبة مني .. وكنت شايفة ان الموضوع عادي وتجربة ومفيش مشاكل فانا كنت غلطانة الموضوع مش عادي ..فضلا عن انه غلط و ميرضيش ربنا. انا عارفة اني في نماذج عملت كده ونجحت واستمرت مع بعض بس دي حالات نادرة .. خلي مرجعنا المنطق 1+1=2 و لايصح الا الصحيح.. كل حاجة تمشي بعدلها احسن ..

طب بالنسبة للناس اللي وقعت في الفخ ده تطلع منه ازاي ..مبقولش اكرهه بعض بس اقطعوا التواصل من بعض الفترة دي منها تتاكدوا فعلا من مشاعركم ومنها تخلوا ربنا راضي عنكم ..عشان ربنا يباركلكم ..ويقدملكم الخير ..

الى البنات :

انتي غلطي واعترافك بالغلط اول خطوة ايجابية في الموضوع ده .. لازم تاخدي موقف حاسم ماتتبعيش هواكي عشان هيضيعك .. هتقوليلي مقدرش يعدي يوم من غير مااسمع صوته ..اصلك عمرك ماهتحسي بيا لانك مجربتيش الاحساس ده .. فعلا انا مجربتوش بس ده في حد ذاته يخليكي واثقة فيا اكثر لاني لحد دلوقتي بفكر بالعقل اللي انتي لاغياه ومطاوعة نفسك اكبر عدو ليكي انا خايفة عليكي .. انتي انسانة رقيقة وجميلة اي صدمه هتكسر حاجه جواكي ..خلي عندك بعد نظر واسالي نفسك سؤال واحد ..هتعملي ايه لو الموضوع ده مكملش ؟؟ توقعي اي حاجه وافترضي اسوا الاحتمالات و في المواضيع دي متجازفيش واختاري الحل الاسلم .

فوضي الامر لله .وربنا هيتولاك وهيرزقك بالزيادة .."فمن ترك شيئا لله عوضه الله خيرا منه " ... استنيه لو بتحبيه الحب ده رزق من ربنا فاتصرفي في رزق ربنا صح  متتصرفيش بحماقة .

الى الولاد :

انت برده غلطت ولازم تعترف بغلطك وتبقى صريح مع نفسك ... مش هقولك بقى لو بتحبها حافظ عليها واعتبرها زي اختك كل ده كلام اتهرس ... بس هقولك حافظ على نفسك.. انت ناسي انك هتتحاسب زيها , لو مكانش من المجتمع اكمنك ولد .. فالمولى عز وجل مطلع .. بص لو خايف انها تضيع منك بسيطة روح لابوها  واشرحله ظروفك وقوله انا قدامي كام سنه على ماجهز نفسي بس انا حبيت ابلغكم .. خطوة صعبه جدا انا عارفة بس احتسبها لله واطلب العون منه وان شاء الله ييسرهالك .

النهارده كنت عاملة زي فاتن حمامة في "ضمير ابلة حكمت" بس كان لازم اعمل كده ..الكلام اللي انا بقوله بنصح نفسي بيه قبلكم انا بشر ومش معصومة .. ولو حد فيكم حس في يوم من الايام انه غلط في حق نفسه وحق ربنا بخصوص الموضوع ده فيسترجع "ان لله وان اليه راجعون" ويستغفر "استغفر الله العظيم واتوب اليه" ويعزم انه مش هيرجع للامر تاني وربنا يقبل توبتنا جميعا :)

الحب من طرف تالت !!!

بعد ماكلمنا شوية على جواز الصالونات .بناءا على طلب الجماهير هنتكلم النهارده على الحب من طرف تالت :) اول  مابتيجي الجملة دي على طول بنفتكر المشهد بتاع سليمان عيد واحمد حلمي  في فيلم ظرف طارئ لما بيقولو "هي بتحب واحد وواحد بيحبها وانا بروح اقعد معاهم كده " .... بس صراحة التعريف اللي عندنا بيختلف حبة بسيطة عن تعريف سليمان عيد ... وهو "ان واحد بيحب نفسه ونفسه بتحبه وانت بتروح تقعد معاهم كده " :)

لو اتكلمنا على مواصفات الطرف الاول هو فعلا شخصية معجبة بنفسها شايف انه يستاهل يتحب ..هتلاقيه من النوع اللي بيحب الاهتمام ويحب يبقى مميز في وسط المجموعه .. دايما كده هتلاقيه مختلف معاهم باراءه بافكاره بلبسه بطريقة كلامه ... عادة بيكون مثقف ,حليوة ,ذكي ,جدع سنة وده اللي بيخلي الطرف الثالث بينجذب ليه ....

الطرف الثالث بقى اللي بيحبه عادة بتكون شخصية عمليه ,مسئولة ,جدية , ناجحة في شغلها ,ليها وضعها بالفعل بين اصحابها , علاقاتها الاجتماعية كتير وده بيبقى ناتج عن انفتاحها على المجتمع اللي حواليها وحبها للاستفادة والتعرف على الشخصيات الناجحة من وجهة نظرها , غالبا بتكون في سن النضوج 20 سنة ومافوق 

وده اللي بيخليها تتهيا ان الحب ده حقيقي مش مجرد اعجاب او انجذاب لشخصية غريبة عن الناس اللي بتقابلهم ... الاعجاب اللي بتحس بيه ده مابينتجش من فراغ يعني مش صحيت من النوم لقت نفسها بتحبه ... لا الحب !! ده نتج عن اهتمام من الطرف الاول ومقدرش احكم هو قاصد ولا مش قاصد  ...ياترى  لما فكر فيها كان بيفكر انها الانسانة اللي بيدور عليها وانه نفسه يقربلها  لانه شايفها هي الشخص اللي هيكمل حياته معاه .. ولا نوع من النساء جذبه شخصها وحب يجربه يشوفوا لايق عليه ولا لا !! هتديله البرستيج والتميز اللي بيسعى اليه ولا مش قد كده ؟ !!

مش قادرة ادرك هو فكر فيها ازاي ...زي مانا وضحت فوق من معالم شخصية الطرف الثالث انه ليس بالشخص الهين اللي بيقع في فخ الحب بسهولة  لكن منقدرش ننكر ان الطرف الاول ذكي ومثقف وحليوة :D _لا ممكن تقع في الفخ بسهولة _ لكن ماذا بعد ؟

هي خلاص فرحانه ومزقططة حسبتها من كل الجوانب حست انها دي الشخصية اللي بتدور عليها لقت فيها كل حاجة لقت الحب والفكر المناسب ليها والطموح ولغة تواصل وحوار هايلة بينهم ..حتى عيوبه كانت متقبلاها ومستعدة انها تتكيف معاها مع العلم ان العيوب دي لو كانت مع حد تاني مكنتش هتستحملها ..طب ايه ؟

المفروض دلوقتي حد يعبر للتاني عن مشاعره عشان نخلص مالحوار ده ونلبس فستان وبدلة ونعمل زفة موتوسيكلات ولولولولوي وان شاء الله والف الف مبروك ...بس ده محصلش !!! ليه؟

عشان هو لحد دلوقتي ماصرحهاش بحاجة وهي كبنت مش هتقدر تروح تصارحه لان اي واحدة مهما بلغ تحررها بتحب ان المبادرة تيجي منه هو ... الا بقى لو قررت تتنازل عن الموضوع ده في سبيل حبه ,وكمان عشان تجيب  اخره فاتروح هي و  تصارحه .. وده نوع من البنات بيمتلك قوة شخصية انا بحسدها عليها ;) ...في نوع تاني من البنات حويط شوية بيحب يمسك العصاية من النص يعتمد على التلميح .والحدق يفهم وهو عشان حدق هيفهم بس ياترى ايه رد فعله ؟؟

ممكن نتوقع منه انه يجاريكي ويقولك هو كمان بيبادلك المشاعر دي .... او ممكن الجزء الدرامي اللي هو يوضحلك بااسلوب رقيق انه مش بيفكر فيكي كده وان انتوا مجرد اصحاب وبس "JUST FRIEND "

لكن هناك شيء اخر لم نتوقعه بعد ..اتدرون ماهو ؟؟؟ "THE OPEN END"

وفكرة "the open end " مبتقتصرش على ان هي  بتحبه وهو مبيحبهاش فيقوم يوضحلها  بصنعة لطافه انه مينفعش وان هي  مش في دماغه تقوم هي تقطع عرق وتسيح دمه وتبعد عنه وتنساه  وينزله بالتتر على كده ..لا هو مش عايز يقفل القصه ولا عايز يحسم الامر هو عايز يسيبها "the open end"دايما كده بيديها  امل انه ممكن يحبها وانه حاسس بيها ولا بئس من جرعة اهتمام صغنتوتة ان شاالله لايك على بوست كتبته على الفيس بوك بتاعها  عشان تبقى قاعدة في حيرة تنسى الموضوع فعلا؟ ولا تد يله فرصة يمكن يحبها في يوم من الايام ؟ 

وكانه بيرمي الكورة في ملعبها ..با تطلع  اصيلة وبنت ناس وتستني لحد اما يقرر يحبها ولا لا ... يا تندل معاه وتقلب الطرابيزة ويفوجأ بيها انها كاتبة engaged على البروفايل بتاعها وتفكس لامه وتعيش حياتها  ...

بتكون في قمة الحيرة والالم والانزعاج وشخصيتها بتكون مضطربة شوية وافكار سلبية بتيجيلها ...احساس مروع الصراحة ..

ساعات بتبص لنفسها وبتشوف مدى نجاحها في شغلها ومدى حب الناس ليها ومدى قوتها واصرارها في تحقيق احلامها ورغم كل ده فشلت في انها تكسب قلب واحد بتحبه بجد _هي يتهيالها انها بتحبه بجد _ كانت فاكرة ان الموضوع هيبقى اسهل من كده وانه خلاص ده فعلا اللي بتدورعليه ...

عارفين ايه اللي بيالمها بجد مش كل الحاجات اللي انا قولتها ..اللي بيالمها انه هو عمره ماهيحس بالالم اللي هي  حسة بيه ...عمره ماهتوحشه زي ماهو بيوحشها .عمره هيحاول ينساها زي ماهي بتحاول تنساه لانه مافتكرهاش اصلا ..لما اتنين بيحبوا بعض وبيتفارقوا غصب عنهم ... بيبقى اللي مصبر البنت ان هو بيتالم زي ماهي بتتالم وان في حد حزين على فراقها زي ماهي حزينة على فراقه .... 

خطوات عملية 

1- اولا الحوار ده فاكس جدا واسلم حل انك تنسيه لان هو باختصار شديد مابيعرفش يحب حد غير نفسه واذا كان بيحافظ عليكي فهو عشان عاجبه ان في حد مهتم بيه .

2- اياكي تقولي هنسى الموضوع على امل انه هيحس بغيابك يقوم يجيلك راكع هيهات هيهات .انسي الموضوع عشان هو ميستاهلكيش ولا يستاهل قلبك وبكرة يجيلك الاحسن منه 

3- غيري البيئة اللي حواليكي وبتفكرك بيه ..انشغلي بحاجه جديدة بتحبيها ..حددي هدف في حياتك وركزي على تحقيقه

4-اصبري مش هتقدري تنسي بين يوم وليله القرار مش سهل وهياخد وقت في تنفيذه بس اهم حاجه انك تاخديه وتبداي في تنفيذه

ونهاية  الكلام ..كل اللي انتي مريتي بيه ده تجربة ربنا وضعها في طريقك  عشان يقويكي اكتر ..انت شخص متميز وعندك قوة وارادة يخليكي تتغلبي على ده ,مهما كان مدى المه, ادي الموضوع ظهرك وامضي قدما يافتاتي :D  ..في نجاحات كتير مستنياكي وانجازات منتظرة على شوق انك تحققيها ....

اعتزي بنفسك واعرفي ان ربنا شايلك الاحسن ,وان الموضوع ده مكملش عشان في خير اكتر جايلك , وماتياسيش مصيرك هتلاقي اللي يستاهلك ويستاهل حبك , وبكرة تفتكريه و تضحكي على نفسك وتقولي في سرك الحمد لله ..

عريس يابوووي !!

عريس في اليد خير من عشرة على الشجرة !!

احنا في الزمن ده بنعاني من مشكلة عويصة فحت وهي ان البنات مش لاقية عرسان !!!
ايوة دي حقيقة ...الاحصائيات بتقول ان عدد البنات اكتر من عدد الولاد ..فهنجيب عرسان منين  ؟؟نسرق مثلا :)؟
وده اللي يخلينا نقول ان سوق العرسان شاحح اليومين دول :) ومن باب الطمانينة هو هيفضل شاحح على طول ..

ومن هذا المنطلق ده اللي بيخلي البنات تقفش في اي حد يجيلها, وتقدم تنازلات بعدد شعر راسها, وبتديله الحق ان يعمل سي السيد , وبتسلمه جميع السلطات التشريعيه والقضائيه والفنية والثقافيه من الاخر هو الكل في الكل ولا مؤاخذه .

البنت مبتعملش كده عشان وحشة ولا عشان ناقصها حاجه ولا عشان ماسك عليها ذلة .لا سمح الله .. كل مافي الامر انها خايفة تلاقي نفسها لوحدها في يوم من الايام ..فقررت انها تبقى "لا شيء" مجرد تابع في سبيل انها تعيش مع حد و السلام ..

الجواز بالنسبة لاي بنت لها فرح وزفة وتجهيز شقه واطفال وتكتب على بطاقتها متزوجه :)

حاجات دافيه خالص و بتتمناها اي بنت سواء عندها 10 سنين او 40 سنه ..

لكن انا عندي شوية اسئلة للبنت اللي بتختار عمياني وكل همها تتجوز وخلاص ..

هل الشخص اللي اتقدملك هو ده فعلا اللي نفسك تكملي حياتك معاه ؟

ولا كان نفسك تكملي حياتك مع شخصية تانية, طباع تانية, قيم تانية؟

ولا اصلا كان كل حلمك تتجوزي وخلاص ؟؟!!

ولا في حلم في حياتك نفسك  تحققيه اهم من ده كله  ؟

طبعا ناس كتير هتقولي ده قدرها وقسمتها ونصيبها والبنت في النهاية ملهاش الا جوزها وبيتها ..

اولا : احنا ربنا ادانا عقل واراده تفكري بيهم وتقرري 

ثانيا : صحيح انتي مش عليكي تغيري  قدرك , بس واجب عليكي انك تدوري عليه وتكتشفيه .

ثالثا : انتي فعلا دي رسالتك الاساسية انك تكوّني بيت واسرة وعشان كده لازم تنجحي فيها واول نجاح انك تختاري شريك حياة مناسب ليكي على جميع مستويات  الحياة مش المادي بس  

الخلاصة: 

.هي حياة واحدة هتعيشيها ..فعشيها زي مانتي عايزة ..صح ولا غلط الحاجات دي ترجع لقيمك ومبادءك مش لقيم ومبادئ ناس تانية .

.خدي عهد مع حلمك انك مش هتسبيه وهتحققيه  خليكي شجاعة ومتضعفيش حددي هدفك وانطلقي 

.متنسيش حلمك الاساسي ورسالتك الاساسيه وهي انشاء اسرة بس الاسرة دي مش هتتكون غير لما تكوني انتي وشريك متفاهمين وفي بينكم تفاعل في الاراء والتفكير 

.وانتي بتختاري شريك حياتك "اختاري من يجعلك المرأة التي تود ان تكون "#cpd واحد مؤمن ان ليكي كيان مستقل .

.متخليش خوفك من انك تكبري وتبقي لوحدك يؤثر عليكي وتختاري اي حد والسلام عشان كده انتي فعلا هتبقي لوحد ..اصبري وهيجي اللي هيستاهلك 

.قبل كل حاجه استعيني بالله في قراراتك واتكلمي معاه وقوليله انتي نفسك في ايه ..هو الوحيد اللي هيسمعك وهيفهك وهيديكي اللي بتتمنيه 

"كوني انتي بطلة حياتك مش حد تاني" 

عايز عروسة على المقاس !!!!

طبعا كلنا متفقين على انه كل شيء قسمة ونصيب وان النصيب بيجي في صور كتيره جدا منها قريبتك وبتحبها من وانتوا في اللفة !!!زميلتك في الشغل, صاحبة زميلتك في الشغل, صاحبة صاحبك بعد مافركشوا مع بعض ,حتى جواز الصالونات نوع من انواع النصيب وتقريبا هو ده  الشائع والمفضل في بلدنا وده اللي هناقشوا في المقاله دي ..

جواز الصالونات فيه منه نماذج كتير ناجحه لكن في المقابل فيه منه نماذج اكتر لا يرثى لها ..
هندّي في الاول نبذة مختصرة عن النماذج الناجحه:_
هو كل مافي الامر الزبون اللي هو العريس بيخلص حوار جيشه..يدور على شغلانه او عقد عمل في خليج ...وبعد كده يفضل ياكبد امه يكد ويتعب لحد مايحوش تمن الشقه والشبكة والمهر ....الى ان يصل لاخر مرحلة واللي هيقابل فيها الوحش :) ويقول جملته الشهيره (اما ان عايز اتدوز ماتشوفيلي عروسة.. .).

وهنا بقى بتقوم ام العريس, واخت العريس ,وكل من حابب يخدم اللي جابو العريس بدورهم في ترشيح اشكال والوان مختلفة من العرايس على مستوى البلدان ...يعني باختصار كده عاملين  زي (Arab got talent ) ..
وبيشكلوا  لجنة تحكيم مكونه من امه واخته وهو طبعا ويبدأوا في عمل  filtration  لحد ماينقوا الاحسن بالنسبه ليهم _خطين على ليهم الله يكرمك_...وساعتها بقى نقول مبروووووك _والبس يابرنس_...

تعالوا بقى للنموذج السئ زي مابيقولوا_الهبرة الكبيرة_ ده بقى حكايته حكاية هو بيمر بنفس المراحل الزبون الاولاني غيرش  انه بيتنحى عن منصبه كعضو في لجنة التحكيم و بيخلي امه هي اللي تخترهالوا اهم حاجه تكون بيضه وشعرها طويل ومعاها شهاده عالية عشان يتفشخر بيها قدام زمايله _حييييييييح يامرارتي_ ومن هنا تبدا الكارثه...وتتوالى التساؤلات ...وتبهرك الاجابات .. وعلى راي ابراهيم نصر في الكاميرا الخفيه"ماتيجوا نشوف".....

_هوانت اختارتها بناءا على ايه ؟
_لا صراحة انا ماخترتهاش دي امي هي اللي نقتهالي.
_ايوة نقتهالك بناءا على ايه ..يعني انت كان ليك شروط معينه في زوجتك المستقبلية
_(يرد ببرود) لا والله ابدا ...ده واحنا قاعدين بنتفرج على ساعة مع شريف اتفتح الحوار ولقيت ماما بتسالني [ايه رايك في فلانه؟]
_ها وبعدين ؟
_ابدا ماما قالتلي انها قريبتنا ولحمنا ودمنا وملهاش كلام كتير وامها ست كمل وابوها تاجر كبير يعني مش هيستخسر فيكم حاجه ..وكمان معاها ليساانس اداب ..يعني اصل وفصل واخلاق ومال وعلام .
_وانت اقتنعت ؟؟
_اه ماما قالتلي انها كمان شكلها حلو وبيضة وشعرها طويل .
_ايه بس كده الموضوع خلص ورحت اتقدمت ؟
_اه خلاص هعوز ايه تاني :D
لكن الحق يتقال  هو طلع صاحب موقف ... مرضيش يوافق عليها غير لما راح وشافها ولقاها بيضه وشعرها طويل :/

الخلاصه:-

 الزواج سنة الحياة ومحور الاحداث في حياة الانسان واحيانا بيكون  سبب في تغيير قرارات ومسارات لحياتنا ..كما قال الله تعالى في كتابه العزيز (وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ ).
طبعا كونك ان انت راجل عايز تتجوز دي حاجه متعيبكش بل بالعكس دي تثبت ان انت رجل مسئول بس كل مافي الامر ان طريقتك في البحث عن شريكة حياتك فيها نوع من السطحيه ومن التواكل ..انت لازم يكون عندك الجرأه و الشجاعه الكافييين عشان تدور على الانسانه اللي هتكمل معاك حياتك وتاخد قرار اذا كانت هي او لا .
هي مش مجرد عروسه هتلبسلك ابيض وهترقص معاك سلو وهتروح بيها عزومات عيلتك وصحابك في المناسبات ولما تروح الشغل تسيبها في البيت زي قطعة الديكور   .. هي زوجه يعني واحده هتشاركك سكنك , فكرك , اسمك وهتبقى ام لاطفالك كل ده ميستحقش منك جدية البحث , ودقة الاختيار.
متتهربش من مسئولية الاختيار, متتكاسلش عن مهمة البحث...مش عيب انك تاخد راي حد او تستشير حد انت بتثق فيه بس في النهاية القرار ليك انت لواحد...دي حياتك و دي قراراتك ...

افتتاح

السلام عليكم ورحمة الله وبركاته
اولا :عودا حميدا لي :) نورت البلوجر بتاعتي :D

ثانيا :كتبت اول  امبارح على فيسي اني هعمل سلسلة مقالات بتناقش موضوع معين , المقال ده افتتاح لسلسلة المقالات هنعلن فيه عن اسم السلسله ..وهندي نبذه عن الموضوع اللي هكلم فيه

طبعا انتوا متشوقين انكم تعرفوا الموضوع هتكلم عنه ... هقوله متخافوش :) بس قبل كده فيه حاجات هنبقى متفقين عليها
1- هذه المقالات تعبر عن وجهة نظري اي تشمل الخطا والصواب .
2-من حقك تخالف في الراي و تنتقد بس في حدود الادب الله يكرمك .
3-وارد جدا ان اغير وجهة نظري فيما بعد لو اكتشفت انها غلط .
4- مشاركتكم هتسعدني وهتسرني كمان :)

ندخل بقى في الموضوع الاساسي بتاعنا الا وهو اسم السلسله
اولا السلسله هتبقى مقال اسبوعي كل يوم جمعه الساعه السابعه مساءا ان شاء الله
ثانيا اسم السلسله (قسمه ونصيب ) اكيد عرفتوا الموضوع بيكلم على ايه ...
القصه ومافيها اني لفتت نظري حاجات معينه في المجتمع اللطيف!! بتاعنا بخصوص الجواز وكيفية اختيار شريك الحياه
فقررت ادونها واقول رايي فيها مش كلها سلبيه فيه اراء ايجابيه اكيد >

انتظروني الاسبوع اللي جي واول مقال لينا في السلسله ..ابقو معنا :D

مقاله كئييييييييييييييييييييييييييييييييييييبه :(

ساعات بتبقى مخنوق لدرجة بتمسك فيها قلمك وتكتب او ترسم اي حاجه بتفرغ فيها احساسك وبتعبر بيها على اللي جواك...

بس ساعات بتبقى مخنوق لدرجه لما بتيجي تمسك قلمك بتخنقه معاك وانتوا الاتنين مش بتقدروا تعبروا على اللي جواكوا ..غالبا لان في الوقت ده بيكون مزيج المشاعر معقد شويه عن اللي قبله يعني مثلا في الحاله الاولى هتلاقي مشاعرك سلبيه بس بسيطه زي شعور بالندم لوحده او شعور بالضيق لوحده او شعور بالغضب لوحده برده .. هتقدر تعبر عنهم باي طريقه ... لكن لما تبقى عندك شعور بالندم والغضب والضيق زيد عليهم الخوف والعجز واللامبالاة كل دول انت بتحس بيهم في نفس الوقت......لو انت انسان على مستوى فكري واعي  هتحاول تعمل تحليل لنفسك وتفند المشاعردي وتحاول بقدر الامكان انك تتخلص منها واحده واحده ......وارد جدا انك تستعين باشخاص بتثق فيهم ....وهنا هتلاقي طلعتلك مشكله اكبر هتلهيك عن المشكله الاولانيه وهي انك هتدور حواليك مش هتلاقي ناس كتير انت بتثق فيهم .. او هتلاقيهم بس مش هتلاقيهم متاح ليهم انهم يساعدوك في الوقت ده ..وبكده يابطل هتروح تعمل ايه ؟؟؟

تروح زيييييي المش عارف ايه ترجع لقلمك اللي انت خنقته من شويه وطبطب عليه وورقتك وتكتب او ترسم وواحده واحده كده الاوضاع هتتحسن وادينا استفدنا من اللي حصلنا درس مهم انك تستعين دايما بالله اولا واخر ومن ثم مشاكلك محدش هيحلها غيرك ....

لكن لو جت فرصه وحد وقع تحت ايدك وغلط وسالك انت عامل ايه؟؟؟؟ ماتترددش انك تكئب امه وتحكيله علي اللي جواك بس متافورش وحياة ابوك كله فيه اللي مكفيه ..بس اهو اسمك فضفضت وارتحت شويه بدل مايجرالك حاجه اسم الله عليك ..وفي النهايه عاجبك كلامي حطه حلقة في ودنك معجبكش بله واشرب ميته ولا تزعل نفسك .........والسلام ختام  

اكتب من اجلك انت

كل مره بكتب فيها هنا بكتب لنفسي عشان نفسي بس, المره دي بكتبلك انت وعارفه انه الكلام هيوصلك ,هيوصلك قبل ماكتبه هيوصلك وهو لسه جو قلبي وقبل ماينطقه لساني ولا يترجمه عقلي لان انت اكتر واحد بتحس بيا ....رغم الجفا اللي بتلاقيه مني والبعد عنك والانشغال بغيرك الا انك لسه بتحبني ودايما بتكون سندي ودايما بتحميني وبتغير عليا وبلاقيك جنبي لما احتاجلك ..لا انت على طول جنبي وانا عمري ماستغنيت عنك .

بس انا بغلط في حقك كتيييييييييير خالص وانت بتسامحني .... انا كان ممكن اقابلك واحكيلك عالي جوايا بيني وبينك  بس حبيت اكتبها هنا صراحه ,دورت على سبب اني اكتب هنا ملقيتش سبب واضح غير اني انا حبيت اني المكان ده يشهد على مدى حبي ليك رغم تقصيري في حقك ..
عارفه والله ان المحبه اسرار واني اللي بيني وبينك محدش يعرفه بس سامحني المره دي هبوح بجزء من السر ده ... عايزه الناس كلها تعرف ان انا بحبك ,والله بحبك انت وماليش غيرك,, كل اللي بطلبه منك  انك تسامحني وتاخد بايدي عشان اوصلك وتطهر قلبي من اي نفاق او حقد او غل , وتكفر ذنوبي ..
 (اعوذ بنور وجهك الذي اشرقت له الظلمات وصلح عليه امر الدنيا والاخره ان ينزل بيا غضبك او يحل عليا سخطك لك العتبه تى ترضى ولا حول ولا قوة الابك ) احبك ربي ..احبك يالله 

بريق الالماس

السلام عليكم 

انا هبدا كلامي بشوية اسئله اقراها وفكر باجابتها وانت بتقرا بقية المقال ربما تلاقي بعض من اجابتها جوه المقال وربما يكون ليك راي تاني ....الاسئله كالتالي

 كم واحد قابلته وحبيته ومتخيلتش حياتك من غيره هيبقى شكلها ازاي بس بعد كده سيبتوا بعض ومابقيتش تعرف عنه حاجه ؟
طب كام واحد جنبك دلوقتي ومعاك في حزنك وفرحك وكنت عمرك ماتتخيل ان ده يبقى صاحبك او حبيبك ؟
طب كام واحد مخيبش ظنك وكان زي ماتوقعت انه جدع وصاحب صاحبه وفضل معاك ووقت مابتحتاجله تلاقيه ؟
مفيش بني ادم على وجه الارض الا ومر بالتلات اصناف دول ..المشكله مش في هنا , المشكله في تفسير ده بيحصل ليه ؟؟؟؟؟؟؟؟؟
وازاي ؟؟؟
ازاي لما كنت بتشوف واحد قلبك كان بيتخطف وكنت تحب تتكلم معاه وتشاركه اهتماماته وتعرف بيحب ايه وبيكره ايه .... بس دلوقتي لما بتشوفه بتبقى مش طايقه وبتقول في سرك يارب مايشوفني وتقريبا بتبقى عايز تلطش نفسك قلم انك في يوم عرفت اشكال زي دي ....اقولك انا ازاي او بمعنى اصح اقولك انا ليه ؟؟؟
الانسان عباره عن ايه ؟؟؟؟؟
الانسان مخلوق من طين وربنا نفخ فيه الروح
يعني ارخص حاجه ممزوجه باغلى حاجه باختصار عباره عن سبيكه مكونه من ذرات من الغبار والالماس ..
الحب هو اللي بيخلينا مركزين على بريق الالماس وبنتغافل عن ذرات الغبار الموجوده حواليه ...فانت بتتعامل مع الشخص ده على انه جوهره وجواهرجي في نفس ذات الوقت لانه هو اللي مسئول انه يحافظ على بريقه قدام اللي بيحبوه (الزبون) اللي هو انت يعني ...لكن لما يبقى الجواهرجي ده انت بالنسبه له زبون سكا ولامؤاخذه متفرقش معاه مش هيفكر انه يلمع مجوهراته عشان خاطرك وحتى لو عصرت على نفسك لمونه وقلت ياعم انا شاريك وشاري مجوهراتك وهاتها  هيرزل ويغتت عليك زي الخواجه بيجو اللي بنشوفه في افلام الابيض واسود ويقولك "معلش ياخبيبي اصلها اتباعت" فانت بقى هتخلي عندك شويه دم وتقوله طيب ياعم بشوقك يابا وهتسيبه وتمشي مع انك كنت هتموت على الجوهره دي وكنت ناوي تصونها وتشيلها في عنيك بس تعمل ايه ؟؟؟؟؟؟ مش باديك حاجه تعملها صاحب الجوهره مكانش حريص على انه بنضف الغبار بتاعها عشان يديهالك فالبالتالي مبقيتش بالنسبالك جوهره بقيت بنسبالك كريستاله زجاج معدومه العافيه من العفر عشان كده بتبقى مش طايق تشوفها تاني انت كنت حابب بريقها بس بريقها زال من قدامك ...ودي اجابة السؤال الاول من وجهة نظري .....
االسؤال التاني او العلاقه التانيه ماهي الا انت بتعكس الايه يعني بتبقى انت الجوهره والجواهرجي وبيبقى التاني الزبون بس انت خليك جواهرجي شاطر متبقاش مغفل زي اللي فوق  اكسب الزبون ممكن يكون زبون سقع وانت مش واخد بالك مادام شاري لمع جواهرك وحسن بضاعتك واكرمه كمان في السعر ...باختصار شديد  خلي عندك اصل ..ومدوقش حد من الكاس اللي دوقته ... وصدقني مش هتندم اصل ممكن متلاقيش زبون زيه يصون مجوهراتك ولو لقيت حد غيره فهو مش هيخسر,,, ياسيدي بقى عندك زبونين مش واحد وعلى راي المثل البحر يحب الزياده  ..
اما بقى السؤال التالت والاخير _طولت عليكم انا اسفه _ فدي بقى بتبقى  عباره عن صفقه بين تاجرين ودي بتم في سلام وامان ومابيبقاش فيها  اي مشاكل لان كل واحد بيدي اللي عنده للتاني بس اهم حاجه من فتره والتانيه تعملو جرد وتطمنوا ان حساباتكم مظبوطه عشان محدش ييجي ع التاني .....................

التوجيه بالحب مش بفرد عضلات

لو انت دخلت السوبر ماركت واشتريت حاجات وجيت عشان تحاسب طلعت رزمه فيها الف دولار من جيبك ولسه بتدي الرجل الفلوس واذ بواحد ينتش منك الرزمه ويجري ..في اللحظه دي ايه ممكن يحصلك؟ ...انت هيجيلك حالة تشنج و بعد كده ممكن تصرخ وتستنجد بالناس عشان يساعدوك ...عايزه اسال حضرتك سؤال هل انت في عز عصبيتك وتشنجك ان فيه مبلغ كبير اتسرق منك قدام عينك هتبقى في حمل حد يقولك "انت ايه اللي مخليك تظلع فلوسك كلها ؟ ما غصب عنه اللي سرق تلاقيه محروم ومش معاه ؟؟" اكيد لا 

لكن لو لقيت الناس جريت ومسكت الحرامي ورجعتلك الفلوس والحرامي ده اتحاسب على عملته دي ......وجم الناس وهما بيقدمولك الفلوس قالولك بكل حب "بعد كده خد بالك من فلوسك ومتطلعهاش كلها من جيبك عشان متتسرقش " هتتقبل النصيحه وهتعمل بيها ولا لا ؟ اكيد اه هاتعمل بالنصيحه 
قيس على كده احساس البنت لما بتحصلها حادثه في الشارع سواء كانت معاكسه او تحرش ويجي حد في عز عصبيتها يقولها مانتي غلطانه انتي ايه اللي موديكي هنا ايه اللي ممشيكي هنا ......الخ 
لكن لو رحت كده وخدتلها حقها من اللي ضايقها وبعد كده وجهتلها الكلام بنية انك خايف عليها اكيد هتتقبله منك .....
احنا مبنعارضش التوجيه كمبدا .....احنا بنعارض الاسلوب والطريقه اللي اتقدم بيها التوجيه بس .
طبيعتنا كبنات بنحب اللي يحسسنا انه خايف علينا .. لكن لما تعاملنا على اننا مجرمين في حق المجتمع وتكلمنا بنبرة فرد العضلات فطبيعي اننا نثور .....

الوأد هو الحل

ليه لما الولد بيغلط  حتى لو كانت الغلطه كبيره بنقول طيش شباب وبكره يعقل؟؟؟؟؟؟؟ . وليه لما البنت بتغلط حتى لوكانت ربع غلطة الولد نقول ان البنت دي اهلها معرفوش يربوها وانها قليلة الادب ..الخ ؟؟؟؟؟؟؟؟؟

طب هي مش بشر زيه ..طب هو مش كل بني ادم خطاء التفرقه دي جت من فين اذا كان ربنا عز وجل  مفرقش بينهم في الثواب والعقاب ..

طب بلاش دي ...ليه الولد لما بيعمل حاجه غلط مع البنت سواء كانت معاكسه او تحرش او اغتصاب وخلافه بلاقي اصابع الاتهام دايما بتشير للبنت زي _هي ايه اللي مواديها هناك ....هي ايه اللي ملبسها اللبس ده .... هي أيه اللي مشيها في ساعه متاخره زي دي _

هي فعلا كلها اسباب تؤدي بان البنت (اللي هي الضحيه) تتحول بقدره قادر الى مجرمه في حق الولد الكيوت اللي ياعيني خلت مشاعره تستفز ويضطر اسفا يعمل الرزيله ...مع ان محدش فكر ان أيا ان كانت الاسباب دي متديش الحق انه يتعمل فيها الجرايم دي او تنتهك الانتهاكات دي ..

بس الحمد لله مجتمعنا الواعي قدر انه يوصل لحل جذري هيحل المشاكل دي من العمق

اولا: بالنسبه للمعاكسه البنت اللي بتتعاكس تحمد ربنا لسببين السبب الاول انه كويس انه لقت حد يعبرها ويقولها كلمتين حلوين

والسبب التاني كويس انها جت لحد كده ومحصلش تحرش وحد لمسها غصب عنها وعلى الراي اللي قال هو الكلام بيلزق .

ثانيا : بالنسبه للتحرش .أي بنت تتعرض لحادثة تحرش تمسك الجزمه اللي في رجليها _لا مش تدي بيها الحيوان اللي تحرش زي مانتو فاكرين _لا تحطها في بقها وتسكت ولا من شاف ولا من دري ..ولو هي انسه تحمد ربنا انها لسه بنت ..ولو هي متجوزه تحمد ربنا انه حصل معاها هي مش مع بنتها !!!!!

اما بالنسبه للحاله التالته : اللي هي الاغتصاب فدي بقى جريمه بشعه عشان كده لازم ننظر للموضوع بعمق و ندور على الدوافع اللي خلت جريمه زي دي تحصل ..قوم اعمل ايه ..روح بقى للجاني والمجني عليه  واعرف كل واحد ايه حكايته مع الزمن ....

 بالنسبه للجاني نكتشف انه عاطل ياحبة عيني ,ومش لاقي ياكل وبالتالي مش لاقي يتجوز ... فيئس من الحياه وقام متعاطي مخدرات ..فلما عمل الجريمه ياحرام مكنش في وعيه _معاه عذره برده .

نيجي بقى للمجني عليها البنت ..بتشتغل ماشاء الله ..وبتجهز نفسها وبتحلم باليوم الي تلبس فيه فستانها الابيض _ده لو كانت لسه ملبستوش_او تحلم باليوم اللي تلبسه لعيالها _دي لو لبسته .......بس في نقطه مهمة اوي هي ظروف شغلها بتحتم عليها انها ترجع البيت متاخر ..........ايييييييوه استنى هنا يامعلم اركن كل الكلام ده على جنب وامسك في دي (هي ايه اللي يمشيها لوحدها في وقت متاخر ؟؟؟؟؟)هي غلطانه والغلط راكبها من ساسها لراسها وبهذا ياساده تتبدل الادورار فياخد الجاني دور الضحيه وتاخذ الضحيه دور المجرم ومن هنا تبدا المحاكمه ويصدر الحكم على المتهم بالاعدام سبا وقذفا واحتقارا الى ان تزهد الحياه فتقتل الاحلام اولا ثم الروح ثانيا حتى يهلك الجسد ويواري التراب وبهذا يكن المجتمع قد حل هذه المشكله العصيبه بوءد الاحلام والامنيات والحيويه والاشراقه ...............................................لذلك ياساده _الوأد هو الحل ......

عودة الابن الضال

" بعد عشر سنين ولادكم دول هيكون ليهم شان عظيم في البلد " الجمله دي اكتر جمله لفتت انتباهي  اليوم لما دكتور من كلية هندسة اسكندريه قالها في الحفل الختامي (لمعرض انتل) بمحافظة اسوان , قالها للاطفال والجيل النابغ اللي قدم ابحاث واختراعات عاملها بنفسه وبمساعدة مشرفيه ......

انا كنت من الحضور اللي بيشوفو الحفل ولما الدكتور قال الجمله دي كان نفسي اعقب عليه واقوله حاجه واحده بس ..... اقوله ان الجمله دي لو سمعتها من عشر سنين كان جسمي هيقشعر من مدى تاثيرها على نفسي .
انما دلوقتي انتابني شيء من السخريه والاستهزاء بالجمله دي مع احترامي للدكتور المفعم بالامل بس بصراحه بالبلدي كده  مابقيتش اكل مالكلام ده .
مقدرش انكر ان الاطفال موهوبين ودماغهم نظيفه وان اولياء امورهم شجعوهم على اتخاذ هذا المسار للتنميه .بلاب بلاب بلاب ,بس هل ده كفايه ,,, هل ده اللي هيخليهم كمان عشر سنين  يبقو حاجه محصلتش ,,طب لو كان كده فعلا ....اومال فين اللي قبلهم واللي قبل قبلهم ,,,, فين اللي اتقلهم قبل كده الكلام ده مسمعناش عنهم في بلادنا ولا شوفنا انجازاتهم ,,,,انا عن نفسي مبشوفهمش غير في برامج التوك شو و بعدين بيروحوا فين مش عارفه ,,,,,يمكن يكونو بيصدروهم زي سنابل القمح الدهبيه والقطن الابيض طويل التيله كعربون محبة للدول اللي لحم كتافنا من خيرها ...ده احتمال
بس الاحتمال التاني واللي انا برجحه ان الاطفال الجميله المبدعه دي بتفضل كده كام سنه وبسمي المرحله دي من حياتهم طور الانجازات او(glory days) ....وده مبيقعدش كتير  ,بعد كده ينتقل هذا الطفل اللي مبقاش طفل وشعره شاب ماللي شافه الى طور الخرفان وذلك لانه بيتبع القطيع اي قطيع وبتفرق بقى ممكن يتبع قطيع كليات قمه او قطيع وظيفه حكوميه او قطيع للسفر بره بعقد عمل  ان شا الله هجره غير شرعيه , وبعد كده ينتقل الى طور لامؤاخذه( ......) اللي بيلهث بحثا عن لقمة العيش ..وبهذا تنجح الحكومه في استغلال ثروتها من الموارد البشريه والعقول البناءة  للوطن .....
ايوه الاطفال والشباب دول ثروه واعظم ثروه  في البلد ,والمفروض ان القائمين على الدوله تستغلها في تنمية المجتمع ...السؤال هنا بقى ...... هي امتى القائمين على الدوله استغلت ثروة معينه لتنمية البلد.. كل الثروات اللي بتستغلها ,بتستغلها لنهبها وتحطها في جيبها ...لكن الثروه دي استعمالها خاص ,لان كل مايتنميها بتبقى خطر عليهم وعلى كراسيهم ,وكانها بتتحول لوحش ممكن ياكلهم لو تخلفوا عن مسار التنميه ,وده اللي مش عاوزينه هؤلاء الكهول الذين يتربعون على كراسي العرش ,لان بيشكل خطر عليهم لذلك هم شايفين ان الحل الامثل انهم يتبعو الاطوار السابقه بحيث لايستمر طور الانجاز اكثر من عشر سنوات ....
في النهايه
اتمنى للاطفال الجميله دي انه يكون حظهم احسن مننا ,,واتمنى ان تصدق نبوءة الدكتور اللي قال  كمان عشر سنين هنشوفهم حاجه كبيره اوي ..
واتمنى ان اوضاع البلد تتحسن وان يحكم هذه البلاد من يسعى جاهدا لتنمية ثرواتها ,,لا يابه على كرسيه او على كيفية استنزاف مافي البلد من ثروات ليملأ جعبته .. اتمنى ان يعود لبلادي شبابها..